ڕیاڵ مەدرید لە ڕاگەیاندنی سێیەم گرێبەستی هاوینە نزیک دەبێتەوە

پەیام سپۆڕت - بڕیار تەها

یانەی ڕیاڵ مەدرید ئیسپانی دەیەوێت پێش دەستپێکی جامی جیهانی یانەکان گواستنەوەی ئالڤارۆ کارێراسی بەرگریکاری باڵی چەپ یەکلایی بکاتەوە.

 ماوەی نزیکەی یەک مانگە یانەی شاهانە بۆ گواستنەوەی ئەو بەرگریکارە ئیسپانییە لەگەڵ یانەی بەنفیکا پۆرتوگالی لە گفتوگۆدایە، ڕۆژنامەی مارکای نزیک لە یانە مەدریدییەکەش لە نوێترین هەواڵدا ئاشکرای دەکات، بەرپرسانی یانەی ڕیاڵ مەدرید گفتوگۆکانیان چڕ کردووەتەوە و بۆ گواستنەوەی کارێراس لە قۆناغی کۆتایی ڕێککەوتن نزیک دەبنەوە.

سەرچاوەکە باس لەوە دەکات، پرۆسەیەکی ئاسان نەبووە، بەڵام ئارەزووی ڕیاڵ مەدرید و خواستی جێهێشتنی ئەو یاریزانە وایکردووە دواجار بەنفیکا دەستبەرداری بێت و ڕێگە بە ئەلڤارۆ بدات لەگەڵ تیپەکەی چابی ئەلۆنسۆ لە مۆندیالدا یاری بکات و ئەوەی دەمێنێتەوە بەم نزیکانە ڕیاڵ مەدرید بە فەرمی گرێبەستەکە ڕابگەیەنێت.

کارێراسی 22 ساڵ ئەم وەرزە بەشداری 50 یاری یانەی بەنفیکای کرد بوو، 4 گۆڵ و 5 ئەسیستی تۆمار کردووە.

جێی ئاماژەیە یاریزانەکە لە ساڵانی 2017 تاکو 2020 لە لاوانی یانەی ڕیاڵ مەدرید یاری کردووە.