بەقایی: تاران پێشنیازێكی نوێ لە بارەی ڕێككەوتنی ئەتۆمی دەداتە واشنتۆن

پەیام 

بڕیارە بەم زوانە ئێران پێشنیازێكی نوێ لە بارەی ڕێككەوتنی ئەتۆمیی ڕادەستی ئەمریكا بكات، دوای ئەوەی سەرچاوەكان باس لەوە دەكەن كە تاران پێشنیازەكەی ئەمریكای ڕەت كردووەتەوە.

ئیسماعیل بەقایی وتەبێژی وەزارەتی دەرەوەی ئێران لە لێدوانێكدا بۆ میدیاكان ڕایگەیاند: تاران بەم زووانە لە ڕێگەی عومانەوە پێشنیازێك نوێ پێشكەشی لایەنی ئەمریكی دەكات و دەشڵێت: ئەمریكا دەبێت ئەم دەرفەتە بقۆزێتەوە و لەدەستی نەدات.

وتەبێژی وەزارەتی دەرەوەی ئێران جەختشیی كردەوە كە تا ئێستا هیچ شتێكی نوێ لە دانوستانەكاندا نییە.

لەلایەكی دیكەوە ئاژانسی هەواڵی تەسنیمی ئێران لە زاری سەرچاوەكانەوە بڵاویكردەوە، ئێران لە ماوەی دوو ڕۆژی داهاتوودا وەڵامی فەرمی خۆی بۆ پێشنیازی ئەمریكا لە بارەی گەیشتن بە ڕێككەوتن پێشكەش دەكات، كە چاوەڕوان دەكرێت ئێران لە وەڵامەكەیدا پێشنیازێكی دیكە بۆ ڕێككەوتنەكە بخاتەڕوو، كە بریتییە لە پاراستنی بنەمای پیتاندنی یۆرانیۆم لەسەر خاكی ئێران، لەگەڵ ڕەواندنەوەی سەرجەم ئەو نیگەرانی تۆمەتەی ئەمریكا لە بارەی دۆسیەی ئەتۆمی هەیە، ئەوەش لەبەرامبەر هەڵگرتنی سزاكانی سەر ئێران.