هێرشەکانى سەر غەززە بەردەوامە و دەیان كەسی دیكە شەهید بوون

پەیام 

جەنگی سەر كەرتی غەززە درێژەی هەیە و شكانی ئاگربەستیش لە سێ مانگ نزیك دەبێتەوە، ئەمڕۆش دەیان كەسی دیكە شەهید بوون.

لە 89 هەمین ڕۆژی شكانی ئاگربەستی غەززەدا، سوپای زایۆنی بۆردومانی چڕی كەرتی غەززەی كردەوە و بەو هۆیەوە دەیان كەسی دیكە شەهید و بریندار بوون.

بەپێی زانیارییەكان، تەنیا لە خانیونس لە باشووری كەرتەكە 40 كەس شەهید بوون و لە نۆرەی وەرگرتنی هاوكارییەكانیشدا هەر لە باشووری غەززە  12 شەهید و 50 بریندار تۆمار كراون.

لای خۆیەوە حەماس جارێكی دیكە سەركۆنەی ڕەشەكوژییەكانی سوپای زایۆنی لە كاتی وەرگرتنی هاوكارییەكاندا كردەوە و بە دەرخەری ڕووخساری تاوانكاری ناشیرینی داگیركەر ناوی هێنا.

حەماس ڕایشیگەیاند: ئەم كۆمەڵكوژییە دەیسەلمێنێت داگیركەر برسێتی وەك چەكێك لە جەنگدا بەكاری دەهێنێت.

لە نوێترین ئاماریشدا كە كاتژمێر یەكی پاشنیوەڕۆی ئەمڕۆ بڵاوی كردەوە، وەزارەتی تەندروستی غەززە ڕایگەیاند: لە 48 كاتژمێری ڕابردوودا 90 شەهید و 605 بریندار گەیەنراونەتە نەخۆشخانەكان، 29 شەهید و 380 برینداریان لە نۆرەی وەرگرتنی هاوكارییەكاندا بوون، بەمەیش ئاماری قوربانییانی نۆرەی وەرگرتنی هاوكارییەكان بۆ 274 شەهید و دوو هەزار و 532 بریندار بەرز بووەوە.

هەر بەپێی ئاماری وەزارەتی تەندروستیی كەرتی غەززە قوربانییانی جەنگی نابەرانبەری سەر كەرتەكە لە حەوتی ئۆكتۆبەری 2023ـەوە بۆ 55 هەزار و 297 شەهید و 128 هەزار و 426 بریندار بەرز بووەوە.