ترەمپ: لەگەڵ یەكێتی ئەورووپا گەیشتوونەتە ڕێككەوتنێكی نوێی بازرگانی

پەیام 

سەرۆكی ئەمریكا گەیشتن بە ڕێككەوتنێكی نوێی بازرگانی لەگەڵ یەكێتیی ئەورووپا و سەپاندنی 15% باجی گومرگی بەسەر زۆرینەی كاڵا هاوردەكراوەكانی یەكێتییەكەدا ڕاگەیاند.

لە میانی كۆنگرەیەكی ڕۆژنامەوانیی هاوبەشدا لەگەڵ ئۆرسولان ڤۆن دێرلاین سەرۆكی كۆمیسیۆنی یەكێتیی ئەورووپا لە سكۆتلەندا، دۆناڵد ترەمپ سەرۆكی ئەمریكا ڕایگەیاند: لەگەڵ یەكێتی ئەورووپا گەیشتوونەتە ڕێككەوتنێكی نوێی بازرگانی كە كۆتایی بە سەپاندنی باجی گومرگیی 30% دەهێنێت و ڕێژەكە بە 15% بەسەر كاڵا هاوردەكراوەكانی ناو یەكێتییەكە جێگیر كراوە.

ترەمپ ئاماژەی بەوەیش كرد، یەكێتیی ئەورووپا ڕەزامەندی داوە لەسەر كڕینی وزە لە ئەمریكا بە بەهای 750 ملیار دۆلار، هەروەها بە بڕی 600 ملیار دۆلار وەبەرهێنانی ڕاستەوخۆ لە بازاڕی ئەمریكادا بكات، بەبێ ئەوەی جۆر و كاتی وەبەرهێنانەكان ڕوون بكاتەوە.

سەرۆكی ئەمریكا باسی لەوە كرد، یەكێتیی ئەورووپا هەڵدەستێت بە كڕینی بڕێكی زۆر لە كاڵای سەربازیی ئەمریكی، هەرچەندە قەبارەی مامەڵەكە دیاری نەكراوە.

لای خۆیەوە ئۆرسلان ڤۆن دێرلاین سەرۆكی كۆمسیۆنی یەكێتیی ئەورووپا ڕایگەیاند، ڕێككەوتنەكە سەقامگیری و توانای پێشكەوتن دەهێنێتە ئاراوە و كارێكی گرنگە بۆ كاركردن لە هەردوو كەناراوی زەریای ئەتڵەسیدا.

 ڕێككەوتنەكە دوای چەند مانگێك ناكۆكی هەردوولا لە پەیوەندییە بازرگانیەكان و بەر لە چەند ڕۆژێك لە كۆتاییهاتنی ئەو وادەیە دێت كە ترەمپ بۆ سەپاندنی باجی نوێ دیاریی كردبوو كە سەرەتای مانگی ئابە.