پێش 4 هەفتە
216 جار خوێنراوەتەوە
ئه‌مریكا: پێویسته له لوبنان چه‌ك ته‌نها له ده‌ستی ده‌وڵه‌تدا بێت
حكومه‌تی لوبنان به‌هۆی فشاری ئه‌مریكا تاوتوێی بابه‌تی سنورداركردنی چه‌ك ته‌نها له ده‌ستی ده‌وڵه‌ت ده‌كات و حزبوڵڵاش ڕه‌تیده‌كاته‌وه چه‌ك دابنێت.
نه‌عیم قاسم ئه‌مینداری گشتی حزبوڵڵا له ڕێی په‌یامێكی ڤیدیۆییه‌وه ڕایگه‌یاند: چه‌كی به‌ره‌نگاری به‌شێكه له ده‌ستوور و په‌یوه‌سته به په‌یماننامه‌ی پێكه‌وه ژیان و نابێت به زۆینه‌ی ده‌نگ بڕیاری له‌سه‌ر بدرێت به‌ڵكو پێوستی به كۆی ده‌نگه.
ناوبراو ڕایگه‌یاند كه حزبوڵڵا هیچ ڕێككه‌وتنێكی نوێ ناكات و پێویسته له‌سه‌ر قه‌واره‌ی زایۆنی ڕێككه‌وتنی پێشوو له‌گه‌ڵ لوبنان جێبه‌جێ بكات.
هه‌روه‌ها جه‌ختی كردووه كه هه‌ر خشته‌یه‌كی پێشنیازكراو بۆ چه‌كدانان له‌ژێر به‌رده‌وامی هێرشه دوژمنكاریه‌كانی قه‌واره‌ی زایۆنی ناكرێت ڕه‌زامه‌ندی له‌سه‌ر نیشان بده‌ین، داواشی له حكومه‌تی لوبنان كرد پلانێك دانێت بۆ ڕووبه‌ڕووبوونه‌وه‌ی فشار و هه‌ڕه‌شه‌كان و دابینكردنی پاراستن نه‌ك چه‌كداماڵینی به‌ره‌نگاری خوازان.
ئه‌م لێدوانه دوای ئه‌وه دێت كه پێشتر حكومه‌تی لوبنان به‌هۆی فشاره‌كانی ئه‌مریكاوه گفتوگۆی له‌سه‌ر خشته‌یه‌ك بۆ چه‌كدانانی حزبوڵڵا و سنووردراكردنی چه‌ك ته‌نها له ده‌ستی ده‌وڵه‌ت كرد.
لە تۆڕە کۆمەڵایەتیەکان شەیری بکە