ئۆنروا: بۆ سێیەم ساڵ لەسەریەك 660 هەزار منداڵى غەززەیی لە خوێندن بێبەشدەبن

پەیام 

بۆ سێیەم ساڵ لەسەر یەك سەدان هەزار منداڵ لە كەرتی غەززە لە مافی خوێندن بێبەش دەبن و سەرەتای مانگی ئەیلولیش لە كەناری خۆراوا پرۆسەكە دەست پێدەكات.

لە ڕاگەیەنراوێكدا ئاژانسی فریاگوزاری و بەكارخستنی پەنابەرانی فەڵەستینی (ئۆنروای)، كە ئاژانسێكی سەر بە نەتەوە یەكگرتووەكانە ئاماژەی بەوە كردووە، 660 هەزار منداڵ لە كەرتی غەززە بۆ سێیەم ساڵی لەسەریەك بەهۆی جەنگی سەر كەرتەكەوە لە دەرەوەی پرۆسەی خوێندن ماونەتەوە و جەنگەكەی بە جەنگێك لەسەر منداڵانی غەززە ناو هێناوە.
ئۆنروا جەختی لە مافی منداڵان بۆ زانست و گرنگی ئاگربەست و گەڕانەوەی منداڵان بۆ قوتابخانە و ژیان كردووەتەوە و ئاماژەی بەوە كردووە، لە غەززە منداڵان مەترسییان لەسەرە، كە ببن بە نەوەیەكی لەدەستچوو.

لای خۆیەوە وەزارەتی پەروەردە و فێركردنی باڵای فەڵەستین لەگەڵ ڕاگەیاندنی ساڵی نوێی خوێندن لە كەناری خۆراوا لە سەرەتای مانگی داهاتوودا، ڕوونیكردەوە "لە كەرتی غەززە 700 هەزار خوێندكار ماوەی دوو ساڵی لەسەریەك لە خوێندیان ڕاگیرا و بێبەش بوون لە چوون بۆ قۆناغی ناوەندی گشتی".

ئەمەو بەپێی ئامارەكان، لە كۆمەڵكوژییەكانی قەوارەی زایۆنی بۆ سەر كەرتی غەززە تائێستا زیاتر لە 17 هەزار و 85 قوتابی و زیاتر لە هەزار و 261 خوێندكاری زانكۆی شەهید بوون.