ئامارى گیانلەدەستدان بەهۆی برسیكردنەوە لە كەرتی غـ.ەززە تادێت زیاتر دەبێت

پەیام

ئاماری گیانلەدەستدان بەهۆی برسێتییەوە لەلایەن سوپای زایۆنییەوە لە كەرتی غەززە بۆ 332 كەس بەرزبووەتەوە كە 124 كەسیان منداڵن. 

وەزارەتی تەندروستیی فەڵەستین لە کەرتی غەززە لە كەناڵی خۆی لە تیلیگرامەوە بڵاویكردەوە: لە 24 كاتژمێری ڕابردوودا مردنی 10 كەس بەهۆی برسێتی و بەدخۆراكییەوە تۆمار كراوە، بەوەش ئاماری مردووان بەهۆی برسێتییەوە بۆ 332 كەس بەرزبووەتەوە كە 124 منداڵیان لەنێودایە. 

وەزارەتەكە ڕایشیگەیاند: لە دوای ڕاگەیاندنەكەی ڕێكخراوی (ئای پیك)ەوە سەبارەت بە برسێتی لە كەرتی غەززە 54 حاڵەت تۆمار كراوە، كە نۆیان منداڵن. 

هەینی ڕابردوو، ڕێكخراوی (ئای پیك) جەختی لە بڵاوبوونەوەی برسێتی لە باكووری كەرتی غەززە كردەوە و ڕایگەیاند: پێشبینی دەكرێت تا كۆتایی ئەم مانگەش بۆ ناوچەكانی ناوەڕاست و خوارووی كەرتەكەش بگوازرێتەوە.

لە بەرەبەیانی ئەمڕۆیشەوە، 35 كەس لە ئاكامی هێرش و بۆردومانی ناوچە جیاوازەكانی كەرتی غەززە شەهید بوون كە تەنیا 20یان لە شاری غەززە بوون.

لەلایەكی دیكەوە، بەپێی ئامارە فەڕمییەكان، ژمارەی شەهیدانی كەرتی غەززە لە سەرەتای جەنگەوە بۆ 63 هەزار و 25 كوژراو و بریندارانیش بۆ 159 هەزار و 490 كەس بەرز بووەتەوە كە زۆربەیان ژن و منداڵن.