پێش 4 هەفتە
285 جار خوێنراوەتەوە
ئه‌مریكا هاوكارییه‌كانی بۆ پێشمه‌رگه ڕاده‌گرێت و له‌به‌رامبه‌ردا هاوكارییه‌كانی بۆ دژه‌تیرۆری عێراق زیاد ده‌كات
په‌یام
ماڵپه‌رێكی ئه‌مریكی باس له‌وه ده‌كات، ئه‌مریكا هاوكارییه داراییه‌كانی بۆ پێشمه‌رگه ڕاده‌گرێت و له‌مه‌ودوا به‌رپرسیارێتیی پێدانی مووچه ده‌خاته ئه‌ستۆی حكومه‌تی عێراق.
پێگه‌ی "ئه‌لمۆنیته‌ر" له ڕاپۆرتێكدا ئاماژه‌ی به‌وه كردووه، ئه‌مریكا له بودجه‌ی ساڵی 2026دا، پشتیوانی دارایی بۆ وه‌زاره‌تی به‌رگری عێراق بۆ (48.2) ملیۆن دۆلار كه‌م ده‌كاته‌وه له‌كاتێكدا ساڵی 2025، ئه‌و بڕه (189.1) ملیۆن دۆلار بووه، ئه‌م كه‌مكردنه‌وه‌یه‌ش ده‌كاته ڕێژه‌ی له‌سه‌دا 40.
به‌پێی ڕاپۆرتی ماڵپه‌ڕه‌كه، ئه‌مریكا هاوكارییه داراییه‌كانی بۆ هێزی پێشمه‌رگه ڕاده‌گرێت، پاڵپشتیه‌كانیشی بۆ به‌رگریی عێراق كه‌م ده‌كاته‌وه، له‌به‌رانبه‌ردا هاوكاریی ده‌زگای دژه تیرۆر له (9.3) ملیۆن دۆلاره‌وه بۆ (63.6) ملیۆن دۆلار زیاد ده‌كات.
"ئه‌لمۆنیته‌ر" باسی له‌وه‌ش كردووه، واشنتۆن ده‌ستی كردووه به گواستنه‌وه‌ی پاڵپشتییه داراییه‌كانی له وه‌زاره‌تی به‌رگری عێراق و هێزی پێشمه‌رگه‌وه بۆ ده‌زگای به‌ره‌نگاربوونه‌وه‌ی تیرۆری عێراق، ئه‌مه جگه له‌وه‌ی پاڵپشتییه‌كانی بۆ هێزه‌كانی سوریای دیموكرات هه‌سه‌ده به‌رده‌وام ده‌بێت.
ئه‌م هه‌واڵه له‌كاتێكدایه، ئه‌مڕۆ هاوكاریی دارایی هاوپه‌یمانان به سه‌رۆكایه‌تیی ئه‌مریكا بۆ مانگی حه‌وت، به‌سه‌ر هێزی پێشمه‌رگه‌ی كوردستاندا دابه‌ش ده‌كرێت، بڕی ئه‌و هاوكارییه‌ی مانگانه به‌سه‌ر پێشمه‌رگه‌دا دابه‌ش ده‌كرێت 13 ملیار و 500 ملیۆن دیناره.
لە تۆڕە کۆمەڵایەتیەکان شەیری بکە