وەزارەتی دارایی بۆ وەرگرتنەوەی قەرزەكانى دەست بەسەر 60 موڵكی نالیا و چاڤیلاندا دەگرێت

پەیام 

وەزارەتی دارایی دەست بەسەر دەیان موڵكی كۆمپانیای نالیا و چاڤیدا دەگرێت و بۆ وەرگرتنەوەی قەرزەكان كە دەگاتە 92 ملیار دینار، دەیانفرۆشێتەوە.

بەڕێوەبەرایەتی گشتیی بانكە بازرگانییەكان وەزارەتی دارایی و ئابووری حكومەتی ماوەبەسەرچووی هەرێمی كوردستان، دەستبەسەراگرتنی 60 موڵكی كۆمپانیای نالیا و چاڤی ئاشكراكرد و ڕایگەیاند: بڕیارە لە زیادكردنێكی ئاشكرادا بیانفرۆشێت.

ئەم هەنگاوەی وەزارەتی دارایی دوای بڕیاری دادگا دێت بۆ وەرگرتنەوەی قەرزەكانی لەسەر كۆمپانیای نالیا كە وەك خۆی دەڵێت: لەئێستادا گەیشتووەتە نزیكەی 92 ملیار دینار. 

لە ڕاگەیەنراوێكدا لەوبارەوە، هاتووە: بە پشتبەستن بە بڕیاری سەرۆكایەتی دادگای پێداچوونەوەی هەرێمی كوردستان لە 20ی 10ی 2021 و بڕیاری جێبەجێكردنی دووەمی سلێمانی لە 22ی نۆی 2024 بۆ دانانی نیشانەی گلدانەوە لەسەر موڵكەكان، هەروەها بڕیاری دادگای تێهەڵچوونەوەی ناوچەی سلێمانی لە 26ی 11ی  2024، ئەو موڵكانەی دەستیان بەسەردا دەگیرێت لە چەندین پارچە زەوی، هۆتێل، كافتریا و كابینەی گەشتیاری پێكدێن.

وەزارەتی دارایی ڕایشیگەیاندووە: دوای چەندین ئاگاداركردنەوەی كۆمپانیای نالیا بۆ گەڕاندنەوەی قەرزەكانی و پابەندنەبوونی كۆمپانیاكە، وەزارەت بە مافی خۆی دەزانێت موڵكەكان بفرۆشێت و داوا لە هەر كەس و لایەنێكی ئارەزوومەند دەكات دوای بڵاوبوونەوەی ئاگادارینامە بەشداری لە زیادكردنە ئاشكراكەدا بكات.