ئاگر لە پێنجوێن سەریهەڵدایە و لە شارباژێڕیش هەزار دۆنم پووش و پاوان سووتا

پەیام

لە سنووری شارباژێڕ بەهۆی ئاگرکەوتنەوەوە هەزار دۆنم پووش و پاوان سووتا، لە پێنجوێنیش پێشنیوەڕۆی ئەمڕۆ ئاگر لە گوندی نزارە سەریهەڵدایەوە.

پۆلیسی دارستان و ژینگەی سلێمانی لە ڕاگەیەندراوێكدا بڵاویكردەوە، لە سنووری شارباژێڕ بەهۆی تەزووی كارەباوە هەزار دۆنم پووش و پاوان سووتاوە. 

ڕاشیگەیاندووە: بەهۆی تەزووی كارەباوە لە سنووری ناحیەی زەلان لە شارباژێڕ ئاگرێك كەوتووەتەوە و دەستبەجێ‌ مەفرەزەیەكی (پۆلیسی دارستانی بەشی شارباژێڕ) گەیشتوونەتە شوێنی ئاگرەكە و بە هاوكاری ئاگركوژێنەوەی قەزای چوارتا و خەڵكی ناوچەكە توانراوە ئاگرەكە كۆنترۆڵ بكرێت. 

هەروەها ئاماژەى بەوەشکردووە: ئاگرەكە بووەتە هۆی سووتانی نزیكەی هەزار دۆنم لە پووش و پاوان و داری سروشتی و ڕەز و باخی هاووڵاتیان. 

لەلایەکى ترەوە سەرەڕای كۆنتڕۆڵكردنی ئاگرەكەی پێنجوێن، بەڵام پێشنیوەڕۆی ئەمڕۆ ئاگرەكە لە گوندی نزارەی قەزاكە سەریهەڵدایەوە.

كارمەندێك لە تیمەكانی بەرگریی شارستانیی قەزاكە بە پەیامی ڕاگەیاند: بەهۆی هەڵكردنەوەی باوە ئاگرەكە دووبارە سەریهەڵداوەتەوە.

چەند ڕۆژێكە ئاگر لە سنووری چەند گوندێكی قەزای پێنجوێن كەوتووەتەوە سەرەڕای چەندجارێك كوژاندنەوەی بەڵام بە هۆكاری جیاجیا سەریهەڵدەداتەوە.

دوێنێش لە میانی هەوڵەكانی كوژاندنەوەی ئاگرەكەدا دوو كەس لە تیمە خۆبەخشەكان سووتان و بە مەبەستی چارەسەر ڕەوانەی سلێمانی كران.