پێش 4 هەفتە
172 جار خوێنراوەتەوە
شوان هەورامی، نووسەر و ڕۆشنبیری دیاری ئیسلامی بە نەخۆشیی كۆچی دوایی كرد
پەیام
شوان هەورامی، نووسەر و ڕۆژنامەنووس و ڕۆشنبیری دیاری ئیسلامی لە تەمەنی 58 ساڵیدا كۆچی دوایی كرد.
دوای ماوەیەك لە نەخۆشی، دوانیوەڕۆی ئەمڕۆ، (عەبدولڕەحمان كاكەوەیس) ناسراو بە شوان هەورامی، نووسەر و ڕۆژنامەنووس و ڕۆشنبیری دیاری ئیسلامی لە نەخۆشخانەی هیوا لە شاری سلێمانی كۆچی دوایی كرد و دواتر تەرمەكەی لە مزگەوتی حاجی جەلالی پووشێنی لە سلێمانی نوێژی لەسەر كرا و بەرەو شاری هەڵەبجە بەڕێ كرا و لەوێ لە بەخاك دەسپێردرێت.
شوان هەورامی بەرپرسی بەشی ئەرشیفی كۆمەڵی دادگەریی كوردستان بووە، لە دامەزراندنی كەناڵی ئاسمانیی پەیامیش لە ساڵی 2008 ئەندامی ستنافی بەڕێوەبردنی پەیام و بەرپرسی بەشی كارگێڕی بووە.
شوان هەورامی لەدایكبووی ساڵی 1967ـەی شاری هەڵەبجەیە و لە هەشتاكانی سەدەی ڕابردووەوە ناوێكی دیاری بواری ڕۆژنامەنووسی و ڕۆشنبیریی بزاڤی ئیسلامی بووە، لە نەوەدەكاندا سەرنوسەری ڕۆژنامەی فەرمیی بزووتنەوەی ئیسلامیی پێشوو بووە و ماوەیەكیش ئەندامی سەركردایەتی ئەو حزبە بووە.
لەگەڵ هاوڕێ ڕۆژنامەنووسەكانیدا (گۆڤاری دەنگی باوەڕ)یان دەركردووە، هەروەها سەرنووسەری گۆڤاری پەیڕەو بووە و چەند ساڵێكیش بەرپرسی بەشی هەواڵ بووە لە ڕادیۆی بزووتنەوە لە شاری سنەی ڕۆژهەڵاتی كوردستان. لەگەڵ ڕاگەیاندنی كۆمەڵی ئیسلامییشدا بووەتە بەرپرسی ماڵپەڕیی فەڕمیی كۆمەڵ، لە قۆناغێكیشدا بەرپرسی بەشی هەواڵ بووە لە كەناڵی ئاسمانیی پەیام.
شوان هەورامی نووسەر و وەرگێڕ بووە، قەڵەمێكی دیاری سیاسی بووە و خاوەنی چەند بەرهەمێكی چاپكراوە، یەكەم بەرهەمیشی لە ساڵی 1983 چاپ كردووە بەناوی (سۆراغی ژیان) كە كتێبێكی شیعری بووە.
لە تۆڕە کۆمەڵایەتیەکان شەیری بکە