پێش 2 هەفتە
216 جار خوێنراوەتەوە
سەنتەری پەرەپێدانی لاوان هۆشداری لە خراپی دۆخی لاوان دەدات
په‌یام
لە ڕۆژی جیهانی لاواندا؛ سەنتەری پەرەپێدانی لاوان وێڕای پیرۆزبایی هۆشداری لە خراپی دۆخی لاوانی هەرێمی کوردستان دەدات.
١٢ ی ٨ هەموو ساڵێک لەلایەن نەتەوە یەکگرتووەکانه‌وه بە ڕۆژی لاوان ناسێندراوە، ئێمەش لەو ڕۆژەدا پیرۆزبایی لە لاوانی هەرێمی کوردستان دەکەین و هەموو ئەو لاوانەشی کە لەهەندەران و لەبەر خراپی دۆخی هەرێم و کەمی هەلی کار کۆچیان کردووە و نیشتیمانیان جێهێشتووە.
لە ڕۆژی لاوان هۆشداری ئەدەین بە دەسەڵات و لایەنە پەیوەندیدارەکان بە دۆخی گەنجان و داوا دەکەین هەرچی زووە کار لەسەر کێشە و ئاریشەکانی لاوان بکرێت و گرنگی بەژیانیان بدرێت ئەگەر نا هەرێمی کوردستان ڕووبەڕووی قەیرانی کەمی لاو و گەنج دەبێتەوە ئەویش بەهۆکاری کۆچی بەردەوام كه حكومه‌ت له ئاستی بێ باك و خه‌مسارده.
لاوان بەدەست کەمی هەلی کار و لاوازی داهاتی رۆژانە و نەبوونی خزمەتگوزارییەوە دەناڵێن و هەموو ئەو نەهامەتیانەش حکومڕانانی هەرێم لێی بەرپرسن.
لە ئێستادا گرفتێکی تری گەورە ڕووی لە گەنجان کردووە ئەویش مەترسییەکانی مادەی هۆشبەرەو بازرگانییەکی گەورەی پێوە ئەکرێت لەناوچەکەدا و سەرگەردانی و نەهامەتییەکی ترە بۆ لاوانی خێرلەخۆنەدیوی کورد پێویستە بەهەمووان بەرەنگاری ببینەوە،هەروەها دیاردەی کوشتن ڕووی لەزیادی کردووە کە ئەوەیش دەسەڵات لێی بەرپرسیارە له كاتێكدا کوژراو و بکوژ، زۆربەی چینی گەنجانن، ئەمەش مەترسییەکی گەورەیە.
لاوان لە زۆربه‌ی وڵاتە پێشکەوتووەکان بە سەرچاوەیەکی گرنگی مرۆییدا داده‌نرێن، به‌ڵام بە داخەوە ئەم سەرچاوەش وەکو سەرچاوەکانی تر لە هەرێمی کوردستان خەریکە کەم بایەخ دەکرێت و سوودی لێوه‌رناگیرێت.
ئێمە هەر بەم بۆنەیەوە داوا لە تەواوی لایەنە پەیوەندیدارەکان و ڕێکخراوەکانی تایبه‌ت به لاوان دەکەین فریای دۆخی لاوان بکەون و چاره‌سه‌رێكی گونجاوی بۆ بدۆزنه‌وه.
دوباره پیرۆزبایی ئەکەین و هیوای ژیانێکی خۆش و خۆشگوزەرانی بۆ تەواوی لاوان کورد ده‌خوازین
ئۆفیسی گشتی
سەنتەری پەرەپێدانی لاوان
١٢ ی ٨ ی 2025
لە تۆڕە کۆمەڵایەتیەکان شەیری بکە