دەسەڵات لە باڵەکایەتی ڕێگا نادات تاقیكردنەوە لە بارەی ژیانی پێغەمبەر (ﷺ) بەڕێوەبچێت

پەیام

وا بریاربوو ئێوارەی ئەمڕۆ بەبەشداریی نزیکەى هەزار كەس لە ناوچەی باڵەكایەتی تاقیكردنەوە لە 250 پرسیار دەربارەی ژیانی پێشەوای مرۆڤایەتی (ﷺ) لە ناحیەی قەسرێ لەلایەن مزگەوتی گەورەی قەسرێ بەرێوەبچێت، بەڵام دەسەڵاتی ناوچەكە ڕێگری لێكردن تاقیكردنەوەكە بكەن و مۆڵەتی پێ نەدان.

سەرچاوەیەك لە سەرپەرشتیارانی پڕۆژەكە بەپەیامی ڕاگەیاند "ئەمرۆ لە چوارچێوەى پڕۆژەی چوارەمی مزگەوتی گەورەی قەسرێ، تاقیكردنەوەمان هەبوو، كە پێكهاتبوو لە (٢٥٠) پرسیار دەربارەی ژیان و ئاكار و كردەوەكانی پێشەوای مرۆڤایەتی موحەمەد (ﷺ)، كە بڕیار وابوو بەشێوەیەكی ڕاستەوخۆ و لەسەر پەڕاوی پرسیاری تاقیكردنەوە ئەنجام بدرێت، زیاتر لە (١٠٠٠) كەس لە هەردوو ڕەگەز ناوی خۆیان ناونووس كردبوو".

بڕیاربوو ئەمڕۆ هەینی ٢٠٢٥/٠٨/٢٨ كاتژمێر (05:00)ـی ئێوارە لە گۆڕەپانی یاریگای قەسرێ یاخود مزگەوتی گەورە ئەنجام بدرێت، بەڵام بەرپرسانی ناوچەكە ڕێگەیان نەدا بەشێوەی ڕاستەوخۆ تاقیكردنەوەکە ئەنجام بدرێت و مۆڵەتیان پێ نەداین، بۆیە بەناچاری بەشێوەی (ئۆنلاین) لەسەر گۆگڵ فۆڕم تاقیكردنەوەكە ئەنجام درا.

ئەو سەرچاوەیەی پەیام ڕاشیگەیاند "لەكاتی بەخشینی خەڵات بە سەركەوتووانی پڕۆژەی سێیەمی مزگەوتی گەورەی قەسرێ كە بریتیبوو لە تاقیكردنەوەی سوڕەی (البروج) بە تەفسیرەوە، تەواوی بەرپرسانی حزبی و حكومەی ناوچەكە ئامادەبوون لە ئەندام و كارگێڕانی لق و ناوچەی پراتی قەسرێ و تێبینەرایەتی ئەوقافی چۆمان و بنكەی پۆلیس و ئاسایشی قەسرێ، پاڵپشت و پشتیوانیان دەربڕی بۆ پڕۆژەی داهاتوو، بەڵام ئیمڕۆ بەبێ هۆ نەك هاوكار نەبوون؛ رێگریشیان كرد لە بەئەنجام گەیاندنی ئەم پرۆژەیە، بۆیە ئەمڕۆ سەرجەم بەشداربووان بە دڵێكی خەمگینەوە بەشێوەی ئۆنلاین بەشداری تاقیكردنەوە دەكەن.