ئۆکرانیا: لەبارەى ڕووداوەکەى لالەزار لە سلێمانى مەشقمان بە هیچ هێزێك نەكردووە

پەیام 

باڵیۆزخانەی ئۆكرانیا لە عێراق ڕاگەیەنراوێكی لەبارەی ڕووداوەكانی هەینی ڕابردووی سلێمانی بڵاوكردەوە و ڕایگەیاند: مەشقمان بە هیچ هێزێك لە عێراق و كوردستان نەكردووە.

لە ڕاگەیەنراوێكدا، باڵیۆزخانەی ئۆكرانیا لە عێراق لەبارەی هێرشەكەی شەوی پێنجشەممە لەسەر هەینی هەفتەی ڕابردوو، ئاشكرای كرد "بە تووندی ئەو زانیارییانە ڕەت دەكەینەوە كە لە ژمارەیەك لە دەزگای ڕاگەیاندن بڵاوكراونەتەوە گوایە لایەنی ئۆكرانی لە ئامادەكردن، یان مەشقپێكردنی ئەو كەسانەی لە چالاكییە نایاساییەكان لە عێراق، یان هەرێمی كوردستان بەشدار بوون، تێوەگلاوە".

باڵیۆزخانەی ئۆكرانیا ڕایگەیاند: هەرگیز وڵاتەكەمان لە هیچ چالاكییەكدا نەبووە و نییە، كە پەیوەندی بە مەشقپێكردنی چەكداران، یان دروستكردنی فڕۆكەی بێفڕۆكەوان بۆ بەكارهێنانی نایاسایی لە دەرەوەی خاكەكەی بێت.

باڵیۆزخانەكە ڕایشیگەیاند: ئەم بانگەشانە بە زانیارییەكی چەواشەكارانە و بێ بنەما دادەنرێن و هیچ بنەمایەكی ڕاستییان نییە و بە هەوڵێك بۆ لەكەداركردنی ناوبانگی ئۆكرانیا و سەركردایەتییەكەی دەزانین.

لە دوای ڕووداوەكانی كۆتایی هەفتەی ڕابردووتر و هەفتەی ڕابردووی شاری سلێمانی، میدیای یەكێتیی نیشتمانی ڤیدیۆی دانپێدانانی ژمارەیەك كەسی بڵاوكردەوە گوایە چەكداری هێزی دووپشكی نزیك لە لاهوور شێخ جەنگی سەرۆكی پارتی بەرەی گەل بوون. لە دانپێدانانەكەدا زانیاری ئەوەی تێدا بوو، كە بە چەند مانگێك پێش هێرشەكەی لالەزار چوونەتە ئۆكرانیا و لەوێ ڕاهێنانی بەكارهێنانی درۆن و دروستكردنیان پێكراوە.