پاش دوو رۆژى دیکە تۆمارکردنى فۆڕمی ئەلیكترۆنیی خۆراك دەبێت بە پارە

پەیام 

تا دوو رۆژى دیکە تۆمارکردنى فۆڕمی ئەلیكترۆنیی خۆراك بێبەرانبەر دەبێت، دواتر دەبێت بە پارە و پێویستە هاووڵاتییان لە ناوەندەكانی دابەشكردنی خۆراك خۆیان تۆمار بكەن.

دووشەممەی داهاتوو 1ى 9ى 2025 كۆتا وادەی تۆماركردنە لە فۆڕمی ئەلیكترۆنی خۆراك و دوای ئەوە دەبێت بە پارە و لە ناوەندەكانی دابەشكردنی خۆراك خۆیان تۆمار بكەن.

لە لێدوانێكیدا، محەمەد حەنون وتەبێژی وەزارەتی بازرگانیی عێراق ڕایگەیاند: ژمارەی ئەو كەسانەی  داتاكانیان لە فۆڕمی ئەلیكترۆنیی خۆراك تۆمار كردووە گەیشتووەتە 37 ملیۆن هاووڵاتی، ڕۆژی یەكی ئەیلول، مانگی نۆ، واتە دووشەممەی هەفتەی داهاتوو وادەی كۆتاییە بۆ پڕۆسەكە.

وتەبێژەكەی بازرگانی عێراق ئاماژەی بەوەشكرد "دوای ئەو وادەیە هاووڵاتیان بۆ خۆتۆماركردن دەبێت سەردانی ناوەندەكانی دابەشكردنی خۆراك بكەن و بەرانبەر ئەوەیش بە ڕەزامەندی وەزارەتی دارایی بڕێك پارەی ڕسوومات بدەن".

حەنون وتیشی: ڕێژەی خۆتۆماركردن لە هەرێمی كوردستان گەیشتووەتە 85% بەجۆرێك هەڵەبجە 89%، هەولێر 87%، سلێمانی 86% و دهۆكیش 82% و كۆی گشتی لە هەرێمی كوردستان چوار ملیۆن و 601 هەزاری تێپەڕاندووە.

ئەوەیشی خستەڕوو "پرۆسەی وردبینی دەری خستووە دوو ملیۆن و 750 هەزار ناو بە هۆكاری جیاواز ڕاگیراون".

لەبارەی ئەزموونی سەبەتەی خۆراكیشەوە وتەبێژەكە جەختی كردەوە "ئەزموونێكی ناوازەیە لە ناوچەكەدا و عێراقی لە مەترسیەكانی قەیرانی ئاسایشی خۆراك دوورخستووەتەوە".