پڕۆژەی ڕووناكی لە ناوەندی سلێمانی و پارێزگای هەڵەبجە جێبەجێ كرا

پەیام

لە ئێوارەی 28 ئەم مانگەوە، تەواوی گەڕەكەكانی ناوەندی شاری سلێمانی، كارەبایان بە 24 كاتژمێری كرا.

لە ڕاگەیەندراوێكدا، بەڕێوەبەرایەتیی گشتیی كارەبای سلێمانی ڕایگەیاند، لە 28ـی ئەم مانگەوە، تەواوی گەڕەكانی ناو شاری سلێمانی كە لە پێنج زۆن پێكهاتووە و،  ژمارەیان (32) گەڕەكە لەگەڵ پرۆژەكانی نیشتەجێبوون كراون بە 24 كاتژمێری..

لە ڕاگەیەندراوەكانی بەڕێوەبەرایەتی كارەبا هاتووە، هاوشان لەگەڵ ناوەندی سلێمانی، قەزای قەرەداغ و ناحیەی عەرەبەت و دەورووبەریان كارەبایان بە 24 كاتژمێری كراوە.

لە ڕاگەیەندراوەكەدا هاتووە كە بەگشتی لە پارێزگای سلێمانی (351) هەزار هاوبەشی كارەبا و (1.450.000) ملیۆن هاوڵاتی سلێمانی لە پرۆژەی رووناكی بەشدارییان پێكراوە و (602) موەلیدە كوژاوەتەوە.

هاوكات جێی ئاماژەبۆكردنە هەر ئێوارەی 28 ـی ئەم مانگە تەواوی هاوبەشانی كارەبای سنوری پارێزگای هەڵەبجە لە چوارچێوەی پرۆژەی رووناكی كارەبایان بە 24 كاژمێری كرا.

دوای كەوتنەكاری پرۆژەی ڕووناكی و كارەبای 24 كاتژمێری؛ هاووڵاتیان و چالاكانی سیاسی ناڕەزاییان سەبارەت بە نرخەكانی یەكەی كارەبا دەربڕی بەهۆی زۆریی ئەو بڕەپارەیەی مانگانە بۆ هاووڵاتی دێتەوە، بەو هۆیەشەوە پەرلەمانتارێكی كۆمەڵی دادگەری لە دادگای فیدراڵی سكاڵای تۆمار كرد، بەڵام بە پاساوی پەیوەستنەبوونی بەو دادگایەوە، سكاڵاكە ڕەتكرایەوە.