سەرۆکى ئەمریکا لە كۆشكی سپی لەگەڵ سەرۆكوەزیرانی قەتەر کۆدەبێتەوە

پەیام 

میدیای ئەمریكی باس لەوە دەكەن، كە دۆناڵد ترەمپ سەرۆكی وڵاتەكەیان ئەمڕۆ لە كۆشكی سپی چاوی بە سەرۆكوەزیرانی قەتەر دەكەوێت.

پێگەكانی پێلەتیكۆ و ئەكسیۆسی ئەمریكی بڵاویانكردووەتەوە، كە ئەمڕۆ دۆناڵد ترەمپ سەرۆكی ئەمریكا لە كۆشكی سپی پێشوازی لە محەمەد بن عەبدورڕڕەحمان بن جاسم ئالسانی سەرۆكوەزیرانی قەتەر دەكات و كۆبوونەوەیەكی لەگەڵ ئەنجام دەدات.

پێكەكان ئاماژەیان بەوە كردووە، كە پێشبینی دەكرێت سەرۆكوەزیرانی قەتەر چاوی بكەوێت بە هەریەك لە دۆناڵد ترەمپ سەرۆك و جەی دی ڤانس جێگری سەرۆك و ماركو ڕۆبیۆ وەزیری دەرەوە و ستیڤ ویتكۆف نێردەری تایبەتی سەرۆكی ئەمریكا بۆ ناوچەكە و ژماریەكی بەرپرسی باڵای دیكەی ئەمریكا.

باس لەوەیش كراوە، كە لە كۆبوونەوەكاندا باس لە هێرشەكەی قەوارەی زایۆنی بۆ سەر قەتەر و دانوستانەكانی ئاگربەستی جەنگی سەر كەرتی غەززە دەكرێت.

ئەمە لە كاتێكدایە ئەمریكا بە هاوپەیمانێكی بەهێزی قەتەر لە ناوچەكەدا هەژمار دەكرێت، كە لە دوای حەوتی ئۆكتۆبەرەوە ڕۆڵی نێوەندگیری لە نێوان حەماس و قەوارەی زایۆنی بینیوە و هەوڵەكانی بۆ گەیشتن بە ئاگربەست و گەڕاندنەوەی دیلەكان و دانانی ڕێوشێنێك بۆ ئیدارەی كەرتی غەززە لە دوای جەنگ چڕكردووەتەوە.