2 کاتژمێر پێش ئێستا
73 جار خوێنراوەتەوە
میری قەتەر لە لوتکەى دەوحە: هێرشەکەى ئیسرائیل خیانەتكارانە و ترسنۆكانە بوو
پەیام
لوتكەی لەناكاوی عەرەبی-ئیسلامی لە قەتەڕ بۆ تاوتوێكردنی وەڵامی هێرشەكەی هەفتەی ڕابردووی قەوارەی زایۆنی بۆ سەر دەوحە دەستی پێ كرد.
دوای ئەوەی سێشەممەی ڕابردوو سوپای زایۆنی هێرشێكی سەرنەكەوتووی كردە سەر باڵەخانەیەكی نیشتەجێبون كە كۆبوونەوەی سەركردەكانی بزووتنەوەی حەماسی تێدا بەڕێوە دەچوو، هێرشەكە كاردانەوەی بەرفراوانی بەدوادا هات و وڵاتانی جیهان و ناوچەكە بەئامانجگرتنی قەتەریان بە گرژییەكی مەترسیدار ناو برد.
لە وتەی كردنەوەی لوتكەی لەناكاوی وڵاتانی عەرەبی ئیسلامییدا لە دەوحە، شێخ تەمیم بن حەمەد ئال سانی، میری قەتەر ڕایگەیاند: دەستدرێژیی ئیسرائیلی بۆ سەر دەوحە خیانەتكارانە و ترسنۆكانە و سەرپێچیكارانە بووە.
میری قەتەر ڕایشیگەیاند: حكومەتی توندڕەوەكان لە ئیسرائیل سیاسەتی ڕەگەزپەرستانەی تیرۆریستانە پەیڕەو دەكەن و خەون بەوەوە دەبینن ناوچەی عەرەبی ببێتە ناوچەی هەژموونی ئیسرائیلی، ئەمەش خەونێكی مەترسیدارە.
ئێستا لوتكەی عەرەبی ئیسلامی بەردەوامە و سەرۆك و سەركردەی زۆرینەی ولاتانی ناوچەكە تیایدا بەشدارن و وتەی خۆیان پێشكەش دەكەن، هەمووانیش جەخت لە هاوهەڵوێستی بەرانبەر دەستدرێژی و فراوانخوازییەكانی قەوارەی زایۆنی دەكەنەوە.
لە تۆڕە کۆمەڵایەتیەکان شەیری بکە