3 کاتژمێر پێش ئێستا
26 جار خوێنراوەتەوە
نەتەوەیەكگرتووەكان: لە چوار ڕۆژدا 10 باڵەخانەمان لە غـ.ەززە بۆردومان كراون
پەیام
ڕێكخراوی نەتەوە یەكگرتووەكان ڕایدەگەیەنێت: تەنیا لە چوار ڕۆژی ڕابردوودا 10 باڵەخانەمان لە غەززە لەلایەن سوپای ئیسرائیلەوە بۆردومان كراون.
فیلیپ لازارینی، كۆمسیاری گشتیی ئاژانسی نەتەوە یەكگرتووەكان بۆ بەهاناوەچوون و كارپێكردنی پەنابەرانی فەڵەستین (ئونروا) ئاماژەی بەوە دا، هیچ شوێن و كەسێك لە شاری غەززە و ناوچەكانی باكووری كەرتەكە سەلامەت نییە، ئەوەش بەهۆی ئەوەی كە هێرشە ئاسمانییەكانی سوپای زایۆنی لە زیادبووندایە و بەهۆیەوە ژمارەیەكی زۆر لە فەڵەستینییەكان ئاوارەبوون.
ڕاشیگەیاند: لە میانی چوار ڕۆژدا، 10 باڵەخانەی سەربە ئاژانسەكەیان لە شاری غەززە لەلایەن سوپای داگیركەرەوە بۆردومان كراون.
ئەو بەرپرسەی نەتەوە یەكگرتووەكان دەڵێت، ئەو باڵەخانانەی بۆردومان كراون لەنێویاندا حەوت قوتابخانە و دوو نۆرینگە هەن كە وەك شوێنی حەوانەوە بۆ هەزاران ئاوارەی فەڵەستینی بەكار دەهێندران.
لازارینی داوای ئەوەشی كرد ئاگربەستی بەپەلە لە غەززە بەرپا بكرێت، ڕاشیگەیاند: تیمەكانیان بەپێی توانا بەردەوامن لە پێشكەشكردنی خزمەتگوزاری بە خەڵكی ئاوارەی كەرتە گەمارۆدراوەكە.
لە تۆڕە کۆمەڵایەتیەکان شەیری بکە