لە بەرەبەیانی ئەمڕۆوە بەشێك لە سزاكانی سەر ئێران كارا كرانەوە

پەیام

دوای شكستهێنانی هەوڵەكان بۆ دواخستنی، سزاكان سەر ئێران گەڕانەوە، وڵاتانی ئەورووپاش دەڵێن: ئەوە كۆتایی ڕێگاكە نییە.

دوای ئەوەی تەواوی هەوڵە نێودەوڵەتییەكان بۆ درێژكردنەوەی وادەی ڕاگرتنی سزاكانی سەر ئێران شكستی هێنا، لە كاتژمێر سێ و 30ی خولەكی بەرەبەیان بە كاتی تاران، سزاكانی سەر ئێران كەوتوونەتەوە كار و میكانیزمی سناپ باك، یاخود ماشە، كارا كران.

ئەوەیش دوای ئەوەی هەر یەك لە ئەڵمانیا، بەریتانیا و فەڕەنسا لە ئەنجوومەنی ئاسایشی نێودەوڵەتی ئێرانیان بە پابەندنەبوون بە ڕێككەوتننامەی ئەتۆمیی 2015 تۆمەتبار كرد و پڕۆژەبڕیارێكیش بۆ ڕێگریی لە گەڕانەوەی سزاكان شكستی هێنا.

میكانزمی سناپ باك گەڕانەوەی سزا نێودەوڵەتییەكانی سەر تارانە، سەرنج دەخاتە سەر ئەو كۆمپانیا و ڕێكخراو و كەسانەی بە ڕاستەوخۆ، یان ناڕاستەوخۆ لە بەرنامەی ئەتۆمیی و مووشەكی ئێراندا بەشدارن، ژمارەیەك سزا لەخۆ دەگرێت، لەوانە:

قەدەغەی فرۆشتن و گواستنەوەی چەكی ئاسایی بۆ ئێران، قەدەغەی هەناردە و هاوردە و گواستنەوەی تەكنەلۆجیا و كەرەستەی تایبەت بە بەرنامەی ئەتۆمی و بالیستی، سڕكردنی ئەو كۆمپانیا و كەسانەی پەیوەنددارن بەو دۆسیەوە لە دەرەوەی ئێران.

لای خۆیانەوە، وەزیرانی دەرەوەی ئەڵمانیا، بەریتانیا و فەڕەنسا ڕایانگەیاند: گێڕانەوەی سەرلەنوێی گەمارۆكان بە مانای كۆتاییهاتنی ڕەوتی دیبلۆماسی نایەت، بۆیە داوا لە تاران دەكەین پابەندی بەڵێنە یاساییەكان بێت.