كۆمەڵی دادگەری بەرپرسی مەڵبەندەكانی دیاری كرد و هەڵوێستی لەبارەی ڕۆژئاواشەوە ڕاگەیاند

پەیام

بە سەرپەرشتیی مامۆستا عەلی باپیر، سەرۆكی كۆمەڵی دادگەریی كوردستان، ئەنجوومەنی سەركردایەتیی كۆمەڵی دادگەریی كوردستان كۆبووەوە.

لە تەوەرەی یەكەمدا دوای گفتوگۆ و پەسەندكردنی ڕاپۆرتی لیژنەی باڵای تەشكیلات، بڕیاردرا بەرپرسی مەڵبەند و مەكتەبەكان بە فەرمی دەستبەكاربن و ڕاسپێردران بۆ ڕاپەڕاندنی كارەكانیان.

سەبارەت بە دۆخی ناوچەكە، سەركردایەتیی كۆمەڵ نیگەرانی لە ئاڵۆزییەكان دەربڕی و جەختی لە پاراستنی ئاشتی و ڕێگریكردن لە ڕژانی خوێنی هاووڵاتییان كردەوە.

تایبەت بە ڕۆژئاوای كوردستان، وێڕای دژایەتیكردنی توندوتیژی بۆ یەكلاییكردنەوەی كێشەكان، ڕایگەیاند كە كورد هەمیشە قوربانیی دەسەڵاتە خۆسەپێنەكان بووە، بۆیە پێویستە لە سووریای نوێدا مافەكانی گەلی كورد پارێزراو بن.

لەلایەكی دیكەوە، كۆمەڵ پرسی خستنەلیستی تیرۆری "ئیخوان موسلمین"ی لەلایەن هەندێك وڵاتەوە تاوتوێ كرد و ئەو هەنگاوەی بە نەشیاو و تۆمەتباركردنی بێ بەڵگە وەسف كرد، هەروەها بە جۆرێك لە مامەڵەی نادادپەروەرانە بەرانبەر ڕەوتە ئیسلامییەكان لەقەڵەمی دا.