توركیا تاووتوێی ناردنی هێزی سەربازی بۆ غـ.ەززە دەكات

پەیام

توركیا سەرقاڵی تاووتوێكردنی وردەكارییەكانی ناردنی هێزێكە بۆ غەززە، بڕیارە ئەم پێشنیازە دواتر بۆ پەرلەمان بەرز بكرێتەوە بۆ ئەوەی گفتوگۆی لەسەر بكرێت.

عەبدوڵڵا گولەر سەرۆكی فراكسیۆنی داد و گەشەپێدانی دەسەڵاتدار (ئاكپارتی) لە پەڕلەمانی توركیا ڕایگەیاند: وەزارەتەكانی دەرەوە و بەرگری و دەزگای هەواڵگری نیشتمانی سەرقاڵی وردەكارییەكانن، هێشتا ئەو بابەتانەی پەیوەندییان بە ئاگربەستی هاوبەش و ڕێوشوێنەكانی دوای ئاگربەست لە غەززە و ناوچەكە هەیە، بەوان نەگەیشتوون.
وتیشی: دوای تەواوكردنی وردەكارییەكانی تایبەت بە كات و چۆنێتی ئەنجامدانی ڕێككەوتنەكە، ڕەنگە بڕیاری سەرۆكی توركیا بۆ ناردنی هێزی سەربازی بۆ غەززە، بخرێتە كارنامەی كۆبوونەوەی پەرلەمانەوە.

گولەر ڕوونیشی كردەوە "وەزارەتە پەیوەندیدارەكان وردەكارییەكان و دۆخ و كات دیاری دەكەن، پاشان پێشنیازەكە پێشكەش بە سەرۆك كۆمار دەكرێت بۆ ئەوەی بۆ كۆمەڵەی نیشتمانی گەورەی توركیا بەرز بكرێتەوە". ئەو وتیشی: ئێستا بۆ قسەكردن لەسەر ئەم بابەتە زووە، چونكە ڕووداوەكان هێشتا لە سەرەتادان.

دوێنێ، هەینی، وەزارەتی بەرگریی توركیا ڕایگەیاند: هێزە چەكدارەكان بۆ جێبەجێكردنی هەر ئەركێك كە لە چوارچێوەی پرۆسەیەكدا بۆ پاراستنی ئاشتی لە غەززە پێیان بسپێردرێت، ئامادەن.