8 کاتژمێر پێش ئێستا
160 جار خوێنراوەتەوە
سەرۆكی هوداپار: هەوڵەکانمان بۆ كۆتاییهێنان بە توندوتیژی دەیانساڵە بەردەوامە
پەیام
وەك ئاماژە بە پڕۆسەی چارەسەری ئاشتی، سەرۆكی پارتی دۆزی ئازادی توركیا (هوداپار) ڕایدەگەیەنێت: هەوڵ و كارەكانی ئێمە بۆ كۆتاییهێنان بە توندوتیژی دەیانساڵە بەردەوامە.
لە شاری دیاربەكر لە باكووری كوردستان، دەیەمین "دیداری زانایانی ئایینی" دەستی بە كارەكانی كرد و بڕیارە دوو ڕۆژ بخایەنێت، زانایانی وڵاتانی توركیا، ئێران، سووریا، فەڵەستین، ئەفغانستان و چەند وڵات و ناوچەی دیكە تێیدا بەشدارن.
لە دەستپێكی دیدارەكەدا، زەكەریا یاپیجی ئوغڵو سەرۆكی پارتی دۆزی ئازاد (هوداپار) وتارێكی پێشكەش كرد.
لە بەشێكی وتارەكەیدا و بە ئاماژەدان بۆ گفتوگۆكانی نێوان دەوڵەتی توركیا و پارتی كرێكارانی كوردستان (پەكەكە) ڕایگەیاند: هەوڵ و كارەكانی ئێمە بۆ كۆتاییپێهێنانی توندوتیژی كە 40 ساڵە گەلی ئێمە ژان و ئازارەكانی دەچێژێت، هەروەها بەرقەراری یاسای برایەتی بەردەوامە.
تایبەت بە پرسی كەرتی غەززەش، سەرۆكی هوداپار وتی: جیهانی ئیسلامی بە ئەزموونێكی زۆر سەختدا تێدەپەڕێت، ئەم جۆرە كۆبوونەوانە بۆ دۆزینەوەی ڕێگەچارەیەك و ڕاوێژ لەبارەی پرسەكانەوە زۆر گرنگە.
ئەو وتیشی: دوو ملیار دانیشتووی وڵاتانی ئیسلامی، دۆخی غەززەیان بە دوو ملیۆن حەشیمەتەوە بۆ بەزەیی وڵاتانی ڕۆژئاوایی جێ هێشتووە. كۆمەڵێك بكوژ بە بەرچاوی ئێمە خوشك و برایانمان لە غەززە دەكوژن و ئێمەش لە دوورەوە، دەگرین، نزا دەكەین و بە نەفرینلێكردنیان كۆتاییمان پێ هێناوە.
لە تۆڕە کۆمەڵایەتیەکان شەیری بکە