تێباس یانەی ڕیاڵ مەدرید بە دووڕوو ناو دەبات

دروود محەمەد - پەیام سپۆڕت

خافێر تێباسی سەرۆکی ڕێکخراوی لالیگا هێرشی تووند دەکاتە سەر یانەی ڕیاڵ مەدرید و بە دووڕوو وەسفیان دەکات.

لە میانەی لێدوانێکدا سەرەتا تێباس وتی: ڕیاڵ مەدرید سەرکردایەتی کەمپینێکی گەورەی دەکرد دژی بەڕێوەچوونی یارییەکی لالگا لە نێوان بەرشەلۆنە و ڤیاڕیاڵ لە میامی لە ئەمریکا بە بیانووی ئەوەی ئەو بڕیارە کێبڕکێکە دەشێوێنێت، بەڵام خۆی هیچ کێشەیەکی نییە و لەسەر یاریگای سانتیاگۆ بێرنابیۆ میوانداری لە یارییەکی فەرمی تۆپی پێی ئەمریکی دەکات.

سەرۆکەکەی  ڕێکخراوی لالیگا وتیشی: گاڵتەجاڕییەکە لەوەدایە کە ئەو یانەیەی دژی بەرێوەچوونی یارییەکی لالیگا بوو لە میامی، هەمان یانە بە خۆشحاڵییەوە یاریگاکەی بۆ یارییەکی هەمان وڵات بەکرێ دەدات و فەرشی سووری تێدا دا دەخات و لە میدیا و ڕۆژنامەکانیشییەوە بە کارێکی مەزن  و سەرەوتنێکی گەورە ناوی دەبات.

لە کۆتایی قسەکانیدا خافێر تێباس دەڵێت: بێگومان یانەی ڕیاڵ مەدرید دووڕوو بوو، ژەهری میدیایی و نەبوونی دیدگای دوورمەودا سەرکەوت و کێشەکە نە یەکپارچەیی بوو نە پاراستنی یەکسانی، بەڵکو کیشەکە ئەوە بوو کە کێ ئەو کارەی دەکرد.