بەڕێوەبەرایەتیی خۆسەر: هێرشەكانی سەر كۆبانێ تاوانی جەنگن و دیمەشق لێی بەرپرسیارە

پەیام

بەڕێوەبەرایەتیی خۆسەر ڕاگەیەندراوێكی لە بارەی گەمارۆدانی كۆبانێ بڵاو كردەوە.

بەڕێوەبەرایەتیی خۆسەر لە ڕۆژاوای كوردستان، ڕاگەیەندراوێكی توندی بڵاوكردەوە و تێیدا پابەندیی خۆی بە ئاگربەست دووپاتكردەوە، هاوكات گرووپە چەكدارەكانی سەر بە حكومەتی دیمەشقی بە بەرپرسیاری پێشێلكارییە بەردەوامەكانی ڕێككەوتنەكە ناساند.

لە ڕاگەیەندراوەكەدا هاتووە كە ئەوەی لە كۆبانێ ڕوودەدات تەنها هێرشێكی سەربازی ئاسایی نییە، بەڵكو تاوانێكی جەنگی تەواوە كە ژێرخانە زیندووەكانی شارەكەی كردووەتە ئامانج.

بەهۆی بۆردومانەكانەوە، ئێستا كۆبانێ بەدەست پچڕانی ئاو، كارەبا و پەككەوتنی خزمەتگوزارییە سەرەكییەكانەوە دەناڵێنێت، كە ئامانج لێی ئیفلیجكردنی ژیانی ڕۆژانەی دانیشتوانەكەیەتی.

بەڕێوەبەرایەتیی خۆسەر جەختی كردەوە كە هێرشەكانی سەر كۆبانێ و كانتۆنی جەزیرە، شەڕی قڕكردنی سیستماتیكە بۆ شكاندنی ئیرادەی گەل و لەناوبردنی دەستكەوتە سیاسی و كۆمەڵایەتییەكان.

لەم چوارچێوەیەدا، داوای لە گەلی كورد لە هەر چوار پارچەی كوردستان و دۆستانیان كرد ئاستی تێكۆشان و بەرگری بەرز بكەنەوە.

هاوكات داوا لە كۆمەڵگەی نێودەوڵەتی و هاوپەیمانیی نێودەوڵەتیی دژی داعش كرا، دەستبەجێ دەستوەردان بكەن بۆ ڕاگرتنی هێرشەكان، پاراستنی مەدەنییەكان و ڕێگریكردن لە تێكچوونی زیاتری دۆخی مرۆیی و ئەمنیی ناوچەكە.