پەرلەمان حکومەتى فیدڕاڵى پابەندکرد کە وەک پارێزگاکانى عێراق موچەى هەرێم بنێرێت

پەیام
ئەنجومەنی نوێنەرانی عێراق بڕیاری ستراتیژیی بۆ چەسپاندنی شایستە داراییەکانی فەرمانبەرانی هەرێم و دۆزینەوەی دەروازەی نوێی هەناردەکردنی نەوت پەسەند کرد. 

ئەنجومەنی نوێنەرانی عێراق زنجیرەیەک بڕیاری چارەنووسسازی پەسەند کرد، کە دیارترینیان پابەندکردنی حکومەتی فیدراڵییە بە خەرجکردنی مووچەی فەرمانبەرانی هەرێمی کوردستان هاوشێوەی پارێزگاکانی تری وڵات. 
پەرلەمانی عێراق داوای لە حکومەتی فیدڕاڵ کردووە بەپەلە دەروازەی نوێ بۆ فرۆشتنی نەوتی خاو بدۆزێتەوە و هێڵی بۆریی کەرکووک بۆ جەیهان لە ڕێگەی زوومار و فیشخاپوورەوە نۆژەن بکاتەوە، تاوەکو ڕێگری لە هەر داڕمانێکی ئابووری بکرێت کە کار بکاتە سەر قوت و بژێویی خەڵک. 

هاوکات لە لایەنی کارگێڕی و ئەمنییەوە، بڕیاردراوە سیستەمی ئەسیکۆدای گومرگی لە سەرجەم پارێزگاکان، بە هەرێمی کوردستانیشەوە، جێبەجێ بکرێت. 
پەرلەمانی عێراق جەختی کردووەتەوە کە دەبێت حکومەتی فیدڕال دەسەڵاتی تەواوی بەسەر سەرچاوەکانی بەرهەمهێنان، گواستنەوە و دابەشکردنی نەوتدا هەبێت و بۆ ڕێگری لە قەیرانی سووتەمەنی، سووتەمەنی بۆ کارگەکانی کەرتی گشتی و تایبەت دابین بکات.