6 رۆژ پێش ئێستا
302 جار خوێنراوەتەوە
دوای سەدەیەك توركمان گەڕانەوە بۆ دەسەڵاتی یەكەمی كەركووك
پەیام
ڕێبوار تەها پارێزگاری كەركووك دەستی لەكار كێشایەوە و محەمەد سەمعان پارێزگاری نوێ لە پێكهاتەی توركمان هەڵبژێردرا.
محەمەد سەمعان لە یەكەم لێدوانیدا وەك پارێزگاری نوێی كەركووك ڕایگەیاند، كە كۆتاییان بە حەسرەتێكی 100 ساڵە هێناوە وەك توركمانێك کە پارێزگاری كەركووكە، بەڵام تەنیا بۆ یەك نەتەوە كار ناكات و بڕیارەكان بە ڕاوێژ دەردەكات.
پارێزگاری نوێی كەركووك جەختی لە چارەسەری قەیرانی سووتەمەنی، زیادكردنی كاتژمێرەكانی كارەبا و وەرگرتنی پشكی پترۆدۆلار كردەوە.
پارێزگاری نوێی كەركووك دەستبەكاربوونی خۆی وەك قۆناغێكی مێژوویی ڕاگەیاند، كە تێیدا جەخت لەسەر بنەمای هاوبەشی ڕاستەقینە لە نێوان سەرجەم پێكهاتەكانی كورد، عەرەب، توركمان و مەسیحی دەكاتەوە.
لە وتارێكیدا پارێزگاری نوێی شارەكە ئاماژەی بەوە دا، كەركووك موڵكی هەمووانە و گۆڕانكاری لە بەرپرسانی پارێزگاكە لە ئیدارەی ناوخۆیدا ڕەنگدانەوەی باوەڕبوونە بە پێكەوەژیان، بە ئامانجی سەقامگیری و گەشەپێدانی زیاتری پارێزگاكە لە داهاتوودا.
پارێزگاری نوێ ڕایشیگەیاند: كارنامەی قۆناغی داهاتوو جەخت لە چارەسەركردنی خێرای قەیرانی سووتەمەنی و زیادكردنی كاتژمێرەكانی كارەبا دەكاتەوە، ئەوەش لەرێگەی هەماهەنگی لەگەڵ وەزارەتە پەیوەندیدارەكان و دابینكردنی شایستە داراییەكانی جوتیاران و پەرەپێدانی كەرتەكانی تەندروستی و پەروەردە دەبێت، تاوەكو هەلی كار بۆ گەنجان بڕەخسێنرێت و ئاستی خزمەتگوزارییە گشتییەكان بۆ هاوڵاتییان بەرز بكرێتەوە.
لە تۆڕە کۆمەڵایەتیەکان شەیری بکە