شکستی گفتوگۆکانی ئاشتی نرخی نەوتی بۆ چوارەم ڕۆژ لەسەر یەک بە بەرزی هێشتەوە

بەهۆی بەردەوامیی گرژییەکانی نێوان واشنتن و تاران و داخستنی گەرووی هورمز، نرخی نەوت بۆ چوارەم ڕۆژ لەسەر یەک بەرزبووەوە و خاوی برێنت گەیشتە نزیکەی ١٠٣ دۆلار، ئەمەش هاوکاتە لەگەڵ بنبەستبوونی گفتوگۆکانی ئاشتی. 
نرخی نەوت لە بازاڕە جیهانییەکاندا بەرزبوونەوەی بەرچاوی بەخۆیەوە بینی، بەجۆرێک خاوی برێنت گەیشتە ١٠٢ دۆلار و خاوی تەکساسیش بۆ ٩٣. ٩٣ دۆلار بەرزبووەوە. ئەم هەڵکشانە دوای ئەوە دێت کە لە سێ ڕۆژی ڕابردوودا نرخەکان بە ڕێژەی ١٣٪ زیادیان کردووە، ئەوەش بەهۆی شکستی هەوڵە دیپلۆماسییەکان بۆ دەستپێکردنەوەی گەڕێکی نوێی گفتوگۆکانی ئاشتی لە ناوچەکەدا. 
بارودۆخی گەرووی هورمز وەک هۆکاری سەرەکیی ناجێگیریی بازاڕەکان دەردەکەوێت، کە بەهۆی گەمارۆ دەریایییەکانی ئەمریکا و ئاڵۆزییە سەربازییەکانەوە، جووڵەی کەشتیوانی تێیدا پەکیکەوتووە. بەرپرسانی ئێرانی جەخت لەوە دەکەنەوە کە گەمارۆکان ڕێگرن لەبەردەم دیپلۆماسی، لە کاتێکدا لایەنی ئەمریکی چاوەڕوانی پێشنیازی نوێ لە تاران دەکات بۆ هێورکردنەوەی دۆخەکە. 
شارەزایانی بواری وزە ئاماژە بەوە دەدەن کە بەردەوامیی پەککەوتنی هەناردەی نەوت لە ڕێگەی ئەو گەرووە ستراتیژییەوە، فشارەکان لەسەر نرخ زیاتر دەکات. لە بەرانبەردا، بازاڕەکان بۆ قەرەبووکردنەوەی کەمیی خستنەڕوو، چاویان لە ئاستی کۆگاکان و هەناردەی ئەمریکایە کە لەم ماوەیەدا گەیشتووەتە ئاستێکی پێوانەیی.