وەزیری دادی ئەمریكا: تا ئێستا هێرشبەرەكە دانینەناوە بەهیچدا

پەیام

وەزیری دادی ئەمریكا بە وەكالەت ڕایگەیاند لە ئاهەنگی پەیامنێرانی كۆشكی سپی تەقەی كردووە، ویستویەتی بەرپرسانی ئیدارەی تڕەمپ بكاتە ئامانج ، تا ئێستاش هیچ هاوكاریەكی لێكۆڵینەوەكانی نەكردووە.

تود بلانش، لە چاوپێكەوتنێكدا لەگەڵ تۆڕی ئێن بی سی نیوز ئاشكرای كرد، كە تۆمەتبارە 31 ساڵانەكە، كە خاوەنی باگراوەندێكی ئەكادیمیی دیارە، لە لۆس ئەنجلۆسەوە لە ڕێگەی شەمەندەفەرەوە بەرەو شیكاگۆ و دواتر واشنتۆن گەشتی كردووە بۆ ئەنجامدانی هێرشەكە، وتیشی: وادەدەكەوێت كە هێرشبەرەكە ویستویەتی بەرپرسانی ئیدارەی تڕەمپ بكاتە ئامانج، بە خودی سەرۆكیشەوە.

وەزیری دادی ئەمریكا بە وەكالەت ئاماژەشی كرد، بڕیارە سبەی دووشەممە، گومانلێكراوەكە لەبەردەم دادگای فیدراڵی ئامادە بكرێت و بە فەرمی تۆمەتی هێرشكردنە سەر كارمەندی ئەمنی و هەوڵی كوشتن بە چەك ئاراستە بكرێت، ئەوەشی ئاشكراكرد كە تا ئیستا تۆمەتبارەكە هیچ جۆرە هاوكارییەكی لەگەڵ تیمەكانی لێكۆڵینەوەدا نەكردووە.
ڕووداوەكە شەوی شەممە لە هۆتێل "واشنتۆن هێڵتۆن" ڕوویدا، كاتێك چەكدارەكە لە خاڵێكی پشكنیندا بە تفەنگێك تەقەی لە ئەندامێكی دەزگای خزمەتگوزارییە نهێنییەكان كرد، ئەمەش وایكرد پاسەوانەكان بەپەلە دۆناڵد ترەمپ و میلانیا ترەمپی هاوسەری لە هۆڵی ئاهەنگەكە ببەنە دەرەوە، هێزە ئەمنییەكانش هەر زوو توانییان بە خێرایی هێرشبەرەكە دەستگیر بكەن.