تەقەکەرەکەى ئەمریکا ویستوویەتى بەرپرسانى ئیدارەکەى تڕەمپ بەئامانج بگرێت

پەیام

دۆناڵد ترەمپ لە یەکەم لێدوانیدا دوای ڕووداوى تەقەکردنەکەى کۆشکی سپی، ستایشی کاردانەوەی خێرای دەزگای نهێنی و هێزە ئەمنییەکانی کرد و ڕایگەیاند، هێرشبەرەکە کەسێکی "خراپەکار و نەخۆش" بووە و بە تەنیا کارەکەی ئەنجامداوە. هەروەها دڵنیایی دا کە خانمی یەکەم و جێگری سەرۆک و ئەندامانی حکومەت هەموویان سەلامەتن، ئاماژەی بەوەش کرد کە ئەندامێکی هێزە ئەمنییەکان لە کاتی ڕووبەڕووبوونەوەکەدا بریندار بووە. 

سەبارەت بە ناسنامە و ئامانجی هێرشبەرەکە، کەناڵی سی بی سی نیوزی ئەمریکی لە زاری سەرچاوە ئەمنییەکانەوە بڵاوی کردەوە، تۆمەتبارەکە پاش دەستگیرکردنی دانی بەوەدا ناوە کە مەبەستی بووە تەقە لە بەرپرسانی باڵای ئیدارەی ترەمپ بکات. پۆلیسی واشنتنیش ئاشکرای کرد، هێرشبەرەکە چەندین جۆر چەکی لەوانە تفەنگی ڕاو، دەمانچە و چەند چەقۆیەکی پێبووە. 

لە ئێستادا لێکۆڵینەوەکان بە چڕی بەردەوامن و هێزە ئەمنییەکان لە هەردوو ناوچەی باشووری کالیفۆرنیا و واشنتن سەرقاڵی گەڕان و پشکنینن، لەوانەش پشکنینی ماڵ و شوێنی نیشتەجێبوونی تۆمەتبارەکە لە کالیفۆرنیا. 

ترەمپ وێڕای دەربڕینی نیگەرانی لە دووبارەبوونەوەی هەوڵەکانی تیرۆر لە ئەمریکا، داوای لە هاووڵاتیان کرد کێشە سیاسییەکانیان بە ئاشتییانە و دوور لە توندوتیژی چارەسەر بکەن.