2 کاتژمێر پێش ئێستا
118 جار خوێنراوەتەوە
ئەمریکا... تەقەکەرەکە هاووڵاتی ئەمریکییە و دوو تۆمەتى ئاڕاستە کراوە
پەیام
بەپێی زانیارییەکانی دەزگا ئەمنییەکانى ئەمریکا، ئەو تەقەکەرەی کە لە میانەى ئێوارەخوانەکەى سەرۆکى ئەمریکا و رۆژنامەنووسانى ئەو وڵاتە تەقەى کرد ناوی "کۆڵ تۆماس ئەلین" ـە و تەمەنی ٣١ ساڵە، خەڵکی ویلایەتی کالیفۆرنیایە و پێشتر لە هەمان هۆتێل نیشتەجێ بووە. تۆمەتبارەکە چەند جۆرە چەکێکی پێبووە، لەوانە: تفەنگی ڕاو (شۆتگەن)، دەمانچە و چەقۆ. پڕۆسەی دەستگیرکردنەکە دوای ئەوە هات کە ناوبراو لە خاڵێکی پشکنیندا تەقەی لە ئەفسەرێکی پاسەوانی نهێنی کردبوو.
دۆناڵد ترەمپ لە هەژماری تایبەتی خۆی لە تۆڕی "تروس سۆشیاڵ" وێنەی گومانلێکراوەکەی بڵاوکردەوە و دڵنیایی دا لە تەندروستی ئەو ئەفسەرەی بریندار بووە.
هەروەها ترەمپ ئاماژەی پێ کرد کە ئەفسەرەکە بەهۆی پۆشینی قەڵغانی گوللەنەبڕ لە مردن ڕزگاری بووە، هەرچەندە لە مەودایەکی زۆر نزیکەوە و بە چەکێکی بەهێز تەقەی لێکرابوو.
لە ئێستادا گومانلێکراوەکە لەژێر چاودێریی پزیشکیدایە و ڕووبەڕووی دوو تۆمەتی سەرەکی بووەتەوە، کە بریتین لە بەکارهێنانی چەکی ئاگرین لە کاتی ئەنجامدانی تاواندا و هێرشکردنە سەر ئەفسەرانی فیدراڵی بە چەکی مەترسیدار. تائێستاش پاڵنەرە سەرەکییەکانی پشت هێرشەکە بە نادیاری ماونەتەوە.
لە تۆڕە کۆمەڵایەتیەکان شەیری بکە