تەقەکەرەکە پێشتر نیشتەجێى ئەو ئوتێلە بووە کە تەقەى تێدا کرد

پەیام

دۆناڵد ترەمپ ڕایگەیاند، هێرشکردنە سەر ئاهەنگی نانی ئێوارەی پەیامنێرانی کۆشکی سپی کار ناکاتە سەر هەڵوێستەکانی بەرانبەر ئێران و ئاماژەی پێ کرد کە پێدەچێت خۆی ئامانجی سەرەکیی هێرشبەرە چەکدارەکە بووبێت، هاوکات فۆکس نیوز لە زاری سەرچاوە ئەمنییەکانى ئەمریکاوە گواستییەوە کە هێرشبەرەکە پێشتر نیشتەجێى ئوتێلەکە بووە. 

دۆناڵد ترەمپ، سەرۆکی ویلایەتە یەکگرتووەکانی ئەمریکا، لە کۆنگرەیەکی ڕۆژنامەوانیدا لە کۆشکی سپی وردەکاریی ئەو هێرشەی خستە ڕوو کە کرایە سەر ئاهەنگێکی نانی ئێوارە لە یەکێک لە هوتێلەکانی واشنتن. ترەمپ جەختی کردەوە ڕووداوەکە پەیوەندیی بە شەڕی ئێرانەوە نییە، بەڵام سووربوونی خۆی نیشان دا و ڕایگەیاند ئەم جۆرە هێرشانە ناتوانن پاشەکشەی پێ بکەن لە سەرکەوتن لەو شەڕەدا. 

سەبارەت بە وردەکاریی هێرشەکە، سەرۆکی ئەمریکا ئاماژەی پێ کرد کە کەسێکی چەکدار بە چەندین چەکی جۆراوجۆر و بە هێلەکی دژە گوللەوە، خاڵێکی پشکنینی لە کاتی بەڕێوەچوونی ئاهەنگی پەیامنێرانی کۆشکی سپی بەزاندووە و بەو هۆیەوە ئەندامێکی هێزە ئەمنییەکان بریندار بووە. ترەمپ هێرشبەرەکەی بە "بکوژێکی شاراوە" وەسف کرد و دەڵێت پێدەچێت بە تەنیا کارەکەی ئەنجام دابێت. 

لە کاتی بیستنی دەنگی تەقەکاندا، تیمەکانی پاراستنی سەرۆک بە خێرایی ترەمپ و میلانیای هاوسەریان لە هۆڵەکە بردە دەرەوە. دوای تێپەڕبوونی نزیکەی کاتژمێرێک بەسەر ڕووداوەکەدا، ترەمپ لە ڕێگەی پلاتفۆرمی "تروس سۆشیاڵ" ـەوە دەستگیرکردنی هێرشبەرەکەی پشتڕاست کردەوە و ستایشی کارامەیی و خێرایی دەزگای نهێنی و هێزە ئەمنییەکانی کرد.