سەرۆكایەتیی هەرێم: دەستپێكردنەوەی هێرشەکان پەرەسەندنێكی مەترسیدارە

پەیام 

سەرۆكایەتیی هەرێمی كوردستان لە ڕاگەیەندراوێكدا بە توندی سەركۆنەی هێرشەكانی ئەم دواییە و كردنە ئامانجی ناوچە جیاوازەكانی هەرێمی كرد. 

سەرۆكایەتیی هەرێمی كوردستان بە توندی سەركۆنەی هێرشەكانی ئەم دواییەی سەر هەرێم دەكات و ڕایگەیاند: بەئامانجگرتنی هەرێمی كوردستان و دەستپێكردنەوەی توندووتیژی پەرەسەندنێكی مەترسیدار و پێشێلكارییەكی زەقی سەروەری عێراقە.

هاوكات ئاماژەی بەوەداوە، ئەم هێرشانە هەڕەشە لە سەقامگیریی وڵات دەكەن و كۆسپ دەخەنە بەردەم هەوڵەكانی ئاشتی لە ناوچەكەدا.

ڕاگەیەندراوەكەی سەرۆكایەتیی هەرێم دوای ئەوەدێت، كە ژمارەیەك ناوچە لە پارێزگاكانی هەولێر و سلێمانی لە ڕێی درۆن و مووشەكەوە هێرشیان كرایە سەر و بەو هۆیەوە ژمارەیەك لە ئەندامانی پارتە ئۆپۆزسیۆنەكانی ئێران لە سلێمانی گیانیان لەدەست دا و برینداربوون.