رۆیتەرز: هێشتا ئێران سوورە لەسەر وەرگرتنی باج لە تێپەڕبوون بە گەرووی هورمزدا

تەلەفزیۆنی ئێران گەڕاندنەوەی پێنج کەشتی لە گەرووی هورمز ڕاگەیاند، هاوکات عومان پێشنیازێکی بۆ بەڕێوەبردنی گەرووەکە خستووەتەڕوو، بەڵام تاران سوورە لەسەر وەرگرتنی باجی تێپەڕین بە گەرووەکەدا. 

بەپێی هەواڵێکی تەلەفزیۆنی فەرمیی ئێران، بەرەبەیانی ئەمڕۆ شەش کەشتی هەوڵیان داوە لە ڕێڕەوێکی نائارام و دیارینەکراوەوە بە گەرووی هورمزدا تێپەڕ ببن. بەڵام لە ئەنجامدا کەشتییەکیان تووشی پێکان بووەتەوە و، کەشتییەکانی دیکە کە پێنج دانەبوون لەلایەن هێزەکانی ئێرانەوە ناچار بە گەڕانەوە کراون. میدیاکە جەختی لەوە کردەوە کە تەنیا ڕێڕەوە دیاریکراوەکان بۆ هاتوچۆ سەلامەتن و ڕێڕەوەکانی دیکە ناگەنە هیچ مەبەستێک. 

هاوکات ئاژانسی ڕۆیتەرز لە زاری داتاکانی چاودێریکردنی هاتوچۆی دەریاییەوە بڵاوی کردەوە، لە ماوەی کۆتایی هەفتەدا ڕۆژانە کەمتر لە ١٠ کەشتیی بارهەڵگر بەو گەرووە ستراتیژییەدا تێپەڕیون و بەپێی داتا تۆمارکراوەکان هاتووچۆی کەشتیوانی بە تەواوی کەمی کردووە. 

لەگەڵ ئەوەشدا تۆڕی هەواڵی سی ئێن ئێن لە زاری سەرچاوە ئەمریکییەکانەوە گواستییەوە کە عومان پێشنیازی دروستکردنی میکانیزمێکی بۆ بەڕێوەبردنی خزمەتگوزارییەکانی گەرووی هورمز کردووە، بەڵام ئێران هێشتا پێداگرە لەسەر سەپاندنی باج و بەدەستهێنانی دەستکەوتی ئابووری لە تێپەڕبوونی کەشتییەکان.