سەركردایەتی كۆمەڵ: كێشە و گرفتەكان لە لایەن خودی دەسەڵات خۆیەوە دروستكراون

پەیام  

ئەنجوومەنی سەركردایەتی كۆمەڵی دادگەریی كوردستان كۆ بووەوە و هەڵوەستەی لەسەر قەیرانە بەردەوامەكانی هەرێمی كوردستان كرد كە بەرۆكی خەڵكیان گرتووە.

ئەمڕۆ، شەممە، لە شاری سلێمانی و بە سەرپەرشتی مامۆستا عەلی باپیر سەرۆكی كۆمەڵی دادگەریی كورستان، ئەنجوومەنی سەركردایەتی كۆمەڵ كۆبوونەوەی ئاسایی خۆی ئەنجام دا.

كۆبونەوەكەی ئەنجوومەنی سەركردایەتی كۆمەڵ لە باردوخێكدایە ناوچەكە بەگشتی لە ئاڵنگاریدایە و ئەگەری پێشهات و ڕووداوەكان لەزیادبووندان، بەو هۆیەوە بە گرنگییەوە هەڵوێستەی لەسەر پرسە جیاوازەكان كرد، بەتایبەت ئەو قەیرانانەی پەیوەندییان بە ژیانی هاووڵاتیانەوە هەیە و بەردەوامیش ڕوو لە هەڵكشانن و دەسەڵاتدارانی هەرێمی كوردستانیش هیچ هەنگاوێكیان بۆ چارەسەریان نییە.

لەوبارەوە، كۆمەڵی دادگەریی كوردستان پێی وایە كێشە و گرفتەكانی هەرێمی كوردستان لە لایەن خودی دەسەڵات خۆیەوە دروست كراون و هەر خۆیشیان لە چارەسەركردنیان بەرپرسیارن. بەتایبەت ناتەباییە سیاسییەكان كە ئایندەی هەرێمی كوردستان بەرەو دۆخێكی نادیار دەبەن.

ئەنجوومەنی سەركردایەتیی كۆمەڵ پێیشی وایە لە ڕووی داراییەوە ئەگەر بە باشی ئیدارەی سەرچاوەكانی ژێر زەوی و خاڵە سنوورییەكان و داهاتی ناوخۆ بدرێت چاومان لە دەستی كەس نابێت.

كۆبوونەوەی ئەنجوومەنی سەركردایەتیی كۆمەڵی دادگەری چەند پرسێكی نێوخۆی حزبیشی تاوتوێ كرد و بڕیاری پێویستی لەبارەیانەوە دا.