زانیاری له‌سه‌ر ده‌ستبه‌سه‌رداگرتنی پاره‌و زێڕه‌كانی جومه‌یلی بڵاو كرایه‌وه‌

په‌یام

دادگای لێکۆڵینەوەی تاوانەکانی نەهێشتنی گەندەڵی لە عێراق، بە هەماهەنگی لەگەڵ هەرێمی کوردستان، دەستبەسەرداگرتنی زیاتر لە ٢٠ ملیۆن دۆلار و ٦٠ کیلۆگرام زێڕی لە دۆسیەیەکی گەندەڵیی وەزارەتی نەوتدا راگەیاند.
دادوەری دادگای ناوەندیی لێکۆڵینەوەی تاوانەکانی نەهێشتنی گەندەڵی ئاشکرای کرد، لە پرۆسەیەکی هاوبەشدا بڕی ٢٠ ملیۆن و ٣٤٠ هەزار دۆلاری ئەمریکی و ٢٠٠ ملیۆن دیناری عێراقی، لەگەڵ ٦٠ کیلۆگرام زێڕ و حەوت ئۆتۆمبێل دەستیان بەسەردا گیراوە. ئەم سامانە پەیوەندی بە دۆسیەی عەدنان جومەیلی، بریکاری وەزارەتی نەوت بۆ کاروباری پاڵاوتن و ئەو تۆمەتبارانەی دیکەوە هەیە کە لە ئێستادا دەستبەسەر کراون.
بەپێی راگەیەندراوەکەی دادگا، دۆزینەوە و دەستبەسەرداگرتنی ئەو بڕە پارە و زێڕە، دەرەنجامی رێکارە چڕەکانی بەدواداچوون و لێکۆڵینەوە بوون سەبارەت بەو سامانەی لە رێگەی بەهەدەردانی پارەی گشتی لەو پرۆژانەدا کۆکراونەتەوە کە لەلایەن تۆمەتبارانەوە سەرپەرشتی و جێبەجێ کراون.
دادوەری تایبەتمەندی دۆسیەکە جەختی لەوە کردەوە کە لێکۆڵینەوەکان هێشتا بەردەوامن بۆ ئاشکراکردن و راوەدوونانی ئەو کەسانەی دیکەش کە لەم کەیسەدا تێوەگلاون، تاوەکو تەواوی رێکارە یاساییەکان لە دژیان دەگیرێتە بەر.