كۆمەڵ: بەرپرسیارێتیی گەورەی هەر دۆخێکی نەخوازراو، دەكەوێتە ئەستۆی دەسەڵات

پەیام  

لەبارەى دۆخى ئێستاى هەرێمى کوردستان و ئەو بارگرانییەى خراوەتە سەر شانى هاوڵاتییان، مەكتەبی سیاسیی كۆمەڵی دادگەریی كوردستان لە ڕاگەیەندراوێکدا هۆشداریی بە دەسەڵات دەدات و داوا دەکات بە پەلە نرخى بەنزین و جۆرەکانى سووتەمەنى داببەزێنێت، بە پێچەوانەوە بەرپرسیارێتیی گەورەی هەر دۆخێکی نەخوازراو، دەكەوێتە ئەستۆی دەسەڵات.

ڕاشیدەگەیەنێت، "بێباکیی دەسەڵات لەبەرانبەر ئەم بارودۆخە بەتوندی ئیدانە دەکەین و بە بەرپرسیاری یەکەم لە تێکچوونی گوزەرانی خەڵکی دەزانین".

ئەمەش دەقى ڕاگەیەندراوەکەیە:-

بِسْمِ اللهِ الرَّحْمنِ الرَّحِيمِ
إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ

جەماوەری سەربەرزی کوردستان!
لایەنە سیاسییەكان و چین و توێژە زیانلێکەوتووەکان!

لەکاتێکدا ڕەوشی ئابووری و گوزەرانی هاووڵاتییانی هەرێمی کوردستان گەیشتووەتە ئاستێکی پڕ لە قەیران و مەترسی، بەردەوامیی بەرزبوونەوەی نرخی سووتەمەنی (بەتایبەت بەنزین) و پێداویستییە بنەڕەتییەکانی ژیان، بارگرانییەکی تاقەتپڕووکێنی بەسەر هاووڵاتییان، کاسبکاران و شۆفێراندا سەپاندووە. 

ئاشکرایە ئەم گرانکردنانە بە هەر پاساوێک بن، نەک هەر ڕاستەوخۆ ژیانی ڕۆژانەی خەڵکیان پەك خستووە، بەڵکو تەواوی سێکتەرەکانی بازاڕ و کاسبییان تووشی داڕمان کردووە، كە ئەمەش كاریگەریی نەرێنی لەسەر ژیانی خەڵك داناوە.

ئەوەی جێی نیگەرانییە، بێباکی، بێخەمی، بێدەنگی و بێکرداریی دەسەڵاتی هەرێمی کوردستانە بەرانبەر ئەم کارەساتە، کە بێگومان ئەمەش بەڵگەی ڕوونی گوێنەدانە بە مافە سەرەتاییەکانی هاووڵاتییان و دەستبەرداربوونی بەرپرسیارێتییە نیشتمانیی و نەتەوەيیەكانە لە پاراستنی ئاسایشی ئابووریی کۆمەڵگە، سەرەڕای هۆشدارییە بەردەوامەکان.

وێڕای ئەوە، کەمتەرخەمی لە ئیدارەدانی بازاڕدا و ڕێگەدان بە قۆرخکاری، خەریکە سەقامگیریی کۆمەڵایەتی بە تەواوی ڕووبەڕووی داڕمان دەکاتەوە. 

لەسەر ئەم بنەمایە، ئێمە جەخت لەسەر ئەم خاڵانە دەکەینەوە:

١.  بێباکیی دەسەڵات لەبەرانبەر ئەم بارودۆخە بەتوندی ئیدانە دەکەین و بە بەرپرسیاری یەکەم لە تێکچوونی گوزەرانی خەڵکی دەزانین.

٢. داواکاریین دەستبەجێ بۆ دابەزاندنی نرخەکان، بەپەلە و بەبێ هیچ دواکەوتنێک، نرخی بەنزین و جۆرەکانی سووتەمەنی بۆ ئاستێکی گونجاو داببەزێندرێت و ڕێگریی یاسایی  توند لە بەرزكردنەوەی نرخ و قۆرخکاریی شتومەک لە بازاڕەکاندا بکرێت.

٣. ئەنجامدانی چاکسازیی ڕاستەقینە، دابینکردنی ژیان و گوزەرانی شایستە مافێکی شەرعی و دەستووری هاووڵاتییانە، نەک بەخششی دەسەڵات. چیدی ڕەوا نییە باجی شکستی حوكمڕانی و بێپلانی بخرێتە سەر شانی هاووڵاتیان.

هەر بۆیە هۆشداریی دەدەین کە بەردەوامبوونی دەسەڵات لەسەر ئەم ئاستە لە نابەرپرسیاری، ناڕەزایی زیاتری ڕای گشتی بەشوێندا دێت و دۆخەكە بەرەو خراپتر دەبات، ئۆباڵ و بەرپرسیارێتیی گەورەی هەر دۆخێکی نەخوازراویش، دەكەوێتە ئەستۆی دەسەڵات.

مەكتەبی سیاسیی كۆمەڵی دادگەریی كوردستان
٢٠٢٦/٨/١