شاندێكی په‌رله‌مان بۆ نرخی دۆلار سه‌ردانی بانكی ناوه‌ندییان كرد

په‌یام

شاندێکی پەرلەمانی لە سەردانێکیاندا بۆ بانکی ناوەندیی عێراق، کاریگەرییەکانی نرخی دۆلار لەسەر هەرێمی کوردستان، کێشەی پێشینەکان و هەماهەنگیی نێوان هەولێر و بەغدایان بۆ سوودمەندبوونی هاووڵاتییان تاوتوێ کرد. 

لە چوارچێوەی هەوڵەکان بۆ چارەسەرکردنی کێشە داراییەکانی هاووڵاتییان، هەریەک لە پەرلەمانتاران ئەحمەد حاجی ڕەشید، غالب محەمەد عەلی و دکتۆر باسم ئەلغرابی سەردانی بانکی ناوەندیی عێراقیان کرد. لە کۆبوونەوەکەدا گفتوگۆ لەسەر کاریگەرییەکانی گۆڕانکاریی نرخی دۆلار لەسەر هاووڵاتییانی هەرێمی کوردستان کرا، بەتایبەتی لە بوارەکانی گەشتکردن، خوێندن و چارەسەری پزیشکی. لەم بارەیەوە بانکی ناوەندی ئاشکرای کرد کە چەندین جار نووسراوی فەرمییان ئاراستەی وەزارەتی گواستنەوەی حکومەتی هەرێمی کوردستان کردووە، بەڵام تاوەکو ئێستا وەڵامی پێویستیان وەرنەگرتووە، بڕیاریشە لەپێناو دیاریکردنی بەرپرسیارێتییەکان، لە ئایندەیەکی نزیکدا ئەو نووسراوانە بۆ ڕای گشتی بڵاو بکرێنەوە. 

سەبارەت بە پێدانی دۆلار بە نرخی فەرمی بەو کۆمپانیایانەی کە پڕۆژەکانیان بە شێوەی قیست بە هاووڵاتییان فرۆشتووە، بانکی ناوەندی دووپاتی کردەوە نووسراویان بۆ هەرێمی کوردستان کردووە و پێویستە ئەو بڕیارە جێبەجێ بکرێت. لە هەمان کاتدا، بانکەکە ئاماژەی بە هەوڵەکانی کرد بۆ دابینکردنی بڕی زیاتری دۆلار بە مەبەستی کەمکردنەوەی فشارەکانی سەر بازاڕ و نزیککردنەوەی نرخی فەرمی لە نرخی بازاڕ. هاوکات لەبارەی سیستەمی ئەسیکۆدا، پێشنیاز کراوە کە دۆلار تەنها بۆ مەبەستی هێنانە ناوەوەی کاڵا بەکاربهێنرێت و پێش خەرجکردنی دۆلارەکەش، گەیشتنی کاڵاکان بۆ ناو وڵات پشتڕاست بکرێتەوە. 

لە بەشێکی دیکەی دانیشتنەکەدا، تیشک خرایە سەر تەرخانکردنی نزیکەی ٢,٥ ملیار دۆلار بۆ کەرتی خانووبەرە و ١,٥ ملیار دۆلار بۆ بانکی نیشتەجێبوون (بانکی ئیسکان)، کە ئامانج لێی پێدانی قەرزی خانوو و پشتگیریکردنی هاووڵاتییانە. شاندە پەرلەمانییەکە جەختیان لەسەر گرنگیی دروستکردنی هەماهەنگیی تەواو لەنێوان حکومەتی هەرێمی کوردستان و دامەزراوە فیدراڵییەکان کردەوە، بۆ ئەوەی هاووڵاتییانی هەرێمیش بتوانن لەو پڕۆژە و پێشینانە سوودمەند بن و کاریگەرییە نەرێنییەکانی ناجێگیریی نرخی دۆلاریان لەسەر کەم بکرێتەوە.