بەمزووانە پارێزگارێكی نوێ لە توركمان بۆ كەركووك هەڵدەبژێرێت

پەیام

ئەنجوومەنی پارێزگای كەركووك لە چەند رۆژی داهاتوودا بۆ دیاریكردنی پارێزگارێكی نوێ لە پێكهاتەی توركمان كۆ دەبێتەوە.

محەمەد سەمعان ئاغا، سەرۆكی بەرەی توركمانی و پارێزگاری پێشووی كەركووك دوای دەستنیشانكردنی وەك وەزیری دەوڵەت لە حكومەتەكەی عەلی زەیدی، ڕایگەیاند: ئەنجوومەنی پارێزگای كەركووك لە چەند رۆژی داهاتوودا كۆ دەبێتەوە بۆ هەڵبژاردنی پارێزگارێكی نوێ. 

سەمعان ئاغا لە لێدوانێكدا بۆ ئاژانسی ئەنادۆڵی توركی ئاشكرای كرد "پۆستەكە لە چوارچێوەی ڕێككەوتنی دەستاودەستكردندا جارێكی دیكە بۆ كەسایەتییەكی توركمان دەبێت بۆ چەند مانگی داهاتوو، بەر لەوەی بۆ پێكهاتەی عەرەب بگوازرێتەوە".

ناوبراو ئاماژەی بەوە كرد "ئەمە یەكەمین جارە كەسایەتییەكی سەر بە بەرەی توركمانی پۆستێكی وەزاری لە بەغدا وەردەگرێت". 

وەزیری دەوڵەت باسی لە پەیوەندییەكانی نێوان بەغدا و ئەنقەرە كرد و روونیشی كردەوە كە كار لەسەر دۆسییە هاوبەشەكانی نێوان هەر دوو وڵات و بەهێزكردنی پەیوەندییەكانیان دەكاتەوە.

ئەم لێدوانەی وەزیرە توركومانەكە دوای ئەوە هات كە وەزارەتی دەرەوەی توركیا پێشوازی لە تەواوبوونی كابینەی نوێی حكومەت و دانانی محەمەد سەمعان ئاغا وەك وەزیر كرد و بە هەنگاوێكی گرنگی بۆ سەقامگیری و نوێنەرایەتیی پێكهاتەی توركمان زانی.