بەرهەمهێنانی نەوت لە چوار كێڵگەكەی كەركووك دەگەیەنرێتە 450 هەزار بەرمیل

پەیام

وەزیری نەوتی عێراق ڕایگەیاند: بەرهەمی چوار كێڵگەكەی كەركووك بۆ 450 هەزار بەرمیل لە ڕۆژێكدا بەرز دەبێتەوە.

باسم محەمەد خزەیر، وەزیری نەوتی عێراق رایگەیاند: پڕۆژەی پەرەپێدانی چوار كێڵگەكەی كەركووك بە هاوبەشی لەگەڵ كۆمپانیای بریتیش پێترۆلیۆم (بی پی) ئامانجییەتی ئاستی بەرهەمهێنان بگەیەنێتە 450 هەزار بەرمیل نەوت لە رۆژێكدا و 500 ملیۆن پێ سێجا گازی سروشتی دابین بكات. 

وەزیری نەوت ئاماژەی بەوە كرد "وەزارەتەكەی ستراتیژییەكی گرنگی هەیە بۆ بەرزكردنەوەی توانای بەرهەمهێنانی نەوت و گاز، لەگەڵ سەرنجخستنە سەر كۆتاییهێنان بە سوتاندنی گازی بەفیڕۆ چوو".

خزەیر ڕوونیكردەوە "گرێبەستی پەرەپێدانی كێڵگەكانی كەركووك، بای حەسەن، خەباز و جەمبوور واژوو كراوە و كارەكانیش دەستیان پێكردووە، هاوكات سەرپەرشتیاری كێڵگەكان لە كۆمپانیاكانی نەوت و گازی باكوورەوە بۆ دەستەیەكی هاوبەشی كارپێكردن گوێزراونەتەوە".

وەزیر جەختیشی كردەوە "ئەم هەنگاوە بازدانێكی ئابووریی لە كەركووك دروست دەكات و جگە لە ڕاهێنانی ستافی ئەندازیاری و كارگێڕیی ناوخۆیی، هەموو پڕۆژە پەیوەندیدارەكان لە ناوەوەی پارێزگاكە جێبەجێ دەكرێن".

 وەزیری نەوتی عێراق ڕایشیگەیاند: لە دەرفەتەكانی كار و دامەزراندندا، ئەولەویەت و پێشینەی سەرەكی بۆ گەنجان، ئەندازیاران و پسپۆڕانی تەكنیكی شاری كەركووك و دەوروبەری دەبێت.