2 کاتژمێر پێش ئێستا
93 جار خوێنراوەتەوە
شاندێكی هەرێم سەردانی بەغداد دەكات و لەگەڵ وەزارەتی دارایی كۆدەبێتەوە
پەیام
شاندێكی حكوومەتی ماوەبەسەرچوو سەردانی بەغداد دەكات و لەگەڵ وەزارەتی دارایی فیدڕاڵ كۆ دەبێتەوە.
لە ڕاگەیەنراوێكدا، فەرمانگەی میدیا و زانیاریی حكوومەتی ماوەبەسەرچووی هەرێمی كوردستان ئاشكرای كرد "لە بەردەوامیی دانووستانەكانی حكوومەتی هەرێمی كوردستان لەگەڵ حكومەتی فیدڕاڵی لەبارەی پابەندی و ماف و شایستەكانی هەرێمی كوردستان لە بودجەی گشتیی فیدراڵیی عێراق بۆ ساڵی 2027، ئەمڕۆ هەینی، شاندێكی باڵای دانوستانكاری حكوومەتی هەرێمی كوردستان سەردانی بەغدا دەكات".
بەپێی ڕاگەیەنراوەكە شاندەكە لە هەر یەك لە: سەرۆكی دیوانی ئەنجومەنی وەزیران، سكرتێری ئەنجومەنی وەزیران، سەرۆكی فەرمانگەی هەماهەنگی و بەدواداچوون، بریكاری وەزارەتی سامانە سروشتییەكان، بەڕێوەبەرانی گشتیی بودجە و ژمێركاری لە وەزارەتی دارایی و ئابووریی هەرێمی كوردستان پێك هاتوون.
لە ماوەی سەردانەكەدا، شاندی هەرێم بە هەماهەنگی لەگەڵ نوێنەرە كوردستانییەكان لە دەسەڵاتە فیدڕاڵییەكان و بۆ بەردەوامیدان بە گفتوگۆكان و گەیشتن بە تێگەیشتنێكی هاوبەش و دادپەروەرانە لەسەر پابەندییە دارایی و نەوتییەكانی هەرێمی كوردستان، هەروەها ماف و شایستە دارایییەكانی هەرێم لە بودجەی گشتیی فیدڕاڵی بۆ ساڵی 2027 كۆبوونەوەی فەرمی لەگەڵ وەزارەتی داراییی فیدڕاڵی ئەنجام دەدات.
لە تۆڕە کۆمەڵایەتیەکان شەیری بکە