پێشبینیی دەكرێت لە 10 ڕۆژی یەكەمی مانگی داهاتوودا پەڵەی سەرتاسەری بدات

پەیام 

كۆتایی ئەم مانگە یەكەم بارانی سەرانسەری لە هەرێمی كوردستان دەبارێت و بە پێشبینییش كاتی پەڵەدانی گشتی دیاریی دەكرێت.

شاڵاو هیدایەت، پێشبینیكاری كەشوهەوا، ڕایگەیاند: بەگشتی ڕۆژانی داهاتوو كەشوهەوا سەقامگیر دەبێت و هیچ شەپۆلێكی باران لەئارادا نییە و پلەكانی گەرما جێگیرن، بەڵام پێش كۆتایی مانگ كەمێك بەرز دەبنەوە.

بەپێی پێشبینییەكانی شاڵاو هیدایەت كە لە پەیجی خۆی لە تۆڕی فەیسبووك بڵاوی كردووەتەوە "بەهۆی جێگیربوونی بەرزەپاڵەپەستۆیەكی زەبەلاح لەسەر ناوچەكانی خۆرئاوای ئەورووپا، كۆتایی ئەم مانگە بۆ سەرەتاكانی مانگی داهاتوو یەكەم شەپۆلی بەهێزی باران ڕوو دەكاتە هەرێمی كوردستان و لە مانگەكانی 11 و 12یشدا چەندین شەپۆلی بەهێزی باران و لافاو پێشبینیی دەكرێت".

شاڵاو هیدایەت، پێشبینیكاری كەشوهەوا ڕایشیگەیاند: لە كۆتایی ئەم مانگە بۆ دە ڕۆژی سەرەتای مانگی داهاتوو لە زۆرینەی ناوچەكانی هەرێمی كوردستان پەڵەی تەواو دەدات، لە كۆتایی ئەم مانگەش لە بەشێك لە ناوچەكان، بەتایبەت لە باكوور پەڵە دەدات.

لای خۆیەوە، بەڕێوەبەرایەتی گشتیی كەشناسی و بوومەلەرزەزانی بڵاوی كردەوە: ئەمڕۆ و سبەی كەشوهەوا جێگیر دەبێت و بەرزترین پلەی گەرما لە گەرمیان دەبێت بە 34 پلە و نزمترینیش 17 پلە دەبێت لە حاجی ئۆمەران.