بەغدا و هەولێر لەسەر دانانی خشتەیەكی كاتی بۆ چارەسەری كێشەكان ڕێككەوتن

پەیام
شاندێكی باڵای حكومەتی عێراق بە سەرۆكایەتیی محسن مەندەلاوی جێگری سەرۆكوەزیران بۆ كاروباری وزە لە دهۆك لەگەڵ مەسرور بارزانی، سەرۆكی حكومەتی ماوەبەسەرچووی هەرێم كۆبوەوە. هەردوولا ڕێككەوتن لەسەر دانانی خشتەیەكی كاتی بۆ چارەسەركردنی كێشەی هەناردەكردنی نەوت و پەرەپێدانی كەرتی كارەبا.
بەگوێرەی ڕاگەیەندراوی نوسینگەی ڕاگەیاندنی جێگری سەرۆكوەزیرانی عێراق بۆ كاروباری وزە، شاندێكی باڵای حكومەتی فیدراڵ بە سەرۆكایەتیی محسن مەندەلاوی لە پارێزگای دهۆك كۆبوونەوەیەكی فراوانی لەگەڵ مەسرور بارزانی، سەرۆكی حكومەتی ماوەبەسەرچووی هەرێمی كوردستان و بەرپرسانی هەرێم ئەنجامدا.
لە كۆبونەوەكەدا كە وەزیری نەوت، وەزیری كارەبا و سەرۆكی دەستەی ڕاوێژكارانی عێراق ئامادەی بوون، تاوتوێی دۆسیە هاوبەشەكانی پەیوەست بە وزەی نێوان بەغدا و هەولێر كرا بە ئامانجی لێكتێگەیشتنی ستراتیژی.
بەشداربووانی كۆبوونەوەكە باسیان لە ڕێگاكانی چارەسەركردنی كێشەكانی كەرتی وزە، میكانیزمی هەناردەكردن و بە بازاڕكردنی نەوتی هەرێم و ڕێكخستنەوەی داهاتەكان بەپێی چوارچێوە دەستوری و یاساییەكان كرد، بە شێوازێك كە مافی هەموو عێراقییەكان بپارێزێت؛ هەروەها هەردوولا جەختیان لەسەر چالاككردنی هاوكارییەكان لە كەرتی كارەبادا كردەوە بۆ پاڵپشتیكردنی ئابوریی نیشتمانی و دابینكردنی بەردەوامیی پێداویستییەكان.
لە ڕاگەیەندراوەكەدا هاتووە، "ڕێككەوتین لەسەر دیاریكردنی خشتەیەكی كاتیی ڕوون بۆ چارەسەركردنی دۆسیە هەڵپەسێردراوەكان و بەدواداچونی بەردەوام بۆ جێبەجێكردنیان؛ هەروەها گرنگە پلانی بەرهەمهێنان و وەبەرهێنان هەماهەنگیی بۆ بكرێت تاوەكو پێداویستیی ناوخۆیی پڕ بكرێتەوە و داهاتی گشتی بەرز ببێتەوە".