بۆ گفتوگۆی پڕۆژەیاسای بودجە ئەنجوومەنی وەزیرانی فیدڕاڵ سێشەممە كۆدەبێتەوە

پەیام     

سەرۆكوەزیرانی عێراق دانیشتنی ڕۆژی سێشەممەی ئەنجوومەنەكەی بۆ تاوتوێكردنی پڕۆژەیاسای بودجە تەرخان كرد.
حەیدەر عەبودی، وتەبێژی حكومەتی عێراق ڕایگەیاند: عەلی زەیدی، سەرۆكوەزیران ڕێنمایی داوە دانیشتنی ئەنجوومەنی وەزیران لە ڕۆژی سێشەممە، 10ی مانگ، تەرخان بكرێت بۆ تاوتوێكردنی پڕۆژەیاسای بودجەی گشتیی فیدراڵی بۆ ساڵی دارایی 2027، تاكو پەسەند بكرێت و ڕەوانەی پەرلەمان بكرێت.

عەبودی ڕوونی كردەوە "بودجەی 2027 پشت بە ڕێگەی بەستنەوەی تەرخانكردنی دارایی بە ئەنجامە دیاریكراوەكان دەبەستێت و هۆكارەكانی پارەداركردن بۆ پشتیوانی گەشەپێدانی ئابووری و توانای رووبەڕووبونەوەی مەترسییی و ئاڵنگارییەكان لەخۆ دەگرێت".
ئەو وتیشی: ڕێگەی گەشەپێدان و سندووقی نەوەكان، لە گرنگترین كارە لەپێشینە ستراتیجییەكانی نێو پڕۆژەی بودجە دەبن.

هەر چەندە ئەمڕۆ كۆبوونەوەی ئاسایی ئەنجوومەنی وەزیرانی عێراقە، بەڵام پێشتر وا ڕاگەیەنرا كە لە كۆبوونەوەكەدا گفتوگۆی پڕۆژەیاسای بودجە ناكرێت، بەو پێیەی تائێستا پرسی بودجە و پشكی هەرێمی كوردستان یەكلا نەكراوەتەوە.
لە 27ی مانگی نۆ وەزارەتی دارایی ڕەشنووسی پڕۆژەیاسای بودجەی ئاڕاستەی ئەنجوومەنی وەزیرانی ئابووری كرد، هەر ئەو ڕۆژەش سەرۆكی ئەنجوومەنەكە كە خودی وەزیری دارایی فیدڕاڵە ڕەشنووسەكەی ئاڕاستەی ئەنجوومەنی وەزیرانی فیدڕاڵ كرد.