عێراق: ئەمساڵ زیاترلە 36 ترلیۆن دینار كورتهێنانی دارایی هەبووە

پەیام  

وەزارەتی دارایی عێراق لە نۆ مانگی یەكەمی ئەمساڵدا زیاتر لە 36 ترلیۆن دینار كورتهێنانی دارایی تۆمار كردووە، بە جۆرێك خەرجییە گشتییەكان بە ڕێژەی لەسەدا 41 لە كۆی داهاتەكان زیاتر بوون.
بەپێی ڕاپۆرتی فەرمیی وەزارەتی دارایی عێراق بۆ سێ چارەكی یەكەمی ئەمساڵ، كۆی داهاتی گشتیی وڵات بە هەردوو سەرچاوەی نەوتی و نانەوتییەوە گەیشتووەتە نزیكەی 52 ترلیۆن و 822 ملیار دینار. لەو بڕەش، نزیكەی 40 ترلیۆن و 202 ملیار دیناری بە ڕێژەی لەسەدا 76 لە ڕێگەی فرۆشتنی نەوتەوە بەدەست هاتووە، هاوكات داهاتی نانەوتیش پتر لە 12 ترلیۆن و 620 ملیار دینار بووە كە دەكاتە لەسەدا 24ـی تەواوی داهاتەكان.

لەبەرانبەردا، ئاستی خەرجییە گشتییەكان گەیشتووەتە پتر لە 89 ترلیۆن و 80 ملیار دینار. بەشە هەرە سەرەكییەكەی ئەم خەرجییانە كە لەسەدا 96 پێكدەهێنێت بۆ بواری بەگەڕخستن تەرخانكراوە، لە كاتێكدا پشكی خەرجییەكانی وەبەرهێنان تەنیا لەسەدا چوار بووە.
عێراق زیاتر لە ٩٠٪ی داهاتە گشتییەکانی خۆی لە فرۆشتنی نەوت دابین دەکات بەهۆی داخستنی گەرووی هورمز و نەفرۆشتنی نەوتەكەی داهاتی عێراق كەمیكردووە.
جگەلەوەش لاوازی کۆکردنەوەی داهاتە نەوتییەکان و زۆری ژمارەی فەرمانبەران هۆكاری دیكەن بۆ كورتهێنانی دارایی لە عێراق.