زیاتر لە میلۆنێك بەرمیل نەوتی هەرێم ڕادەستی سۆمۆ كراوە

پەیام 

لە دوای دەستكردن بە هەناردەكردنەوەی، تا نیوەڕۆی ئەمڕۆ زیاتر لە میلۆنێك بەرمیل نەوتی هەرێم ڕادەستی سۆمۆ كراوە و نەوتهەڵگرێكیشی لێ بار كراوە.

ئەمڕۆ حەیان عەبدولغەنی وەزیری نەوتی عێراق لە لێدوانێكیدا ڕایگەیاند، بەر لە چەند ڕۆژێك پرۆسەی پەمپكردنی نەوتی هەرێمی كوردستان بەمەبەستی هەناردەكردنەوەی بۆ بەندەری جەیهانی توركیا لە ڕێگەی بۆرییەوە، دوای زیاتر لە دوو ساڵ لە ڕاگیرانی بە ئەنجام گەیشتووە و بۆ یەكەمجار حكومەتی فیدراڵی نەوتی بەرهەمهێنراوی هەرێمی كوردستانی وەرگرتووە و پرۆسەی هەناردەكردنی بۆ دەرەوەی عێراق لە ئەستۆ گرتووە.

وەزیری نەوتی عێراق ئاماژەی بەوەی كردووە، تا ئیستا بە نزیكەیی زیاتر لە یەك ملیۆن بەرمیل نەوت لەلایەن هەرێمەوە ڕادەستیان كراوە و ئاشكرایشی كرووە، كە یەكەم نەوتگوێزەرەوە بە توانای هەڵگرتنی 650 هەزار بەرمیلی ڕۆژانە بار كراوە و لە بەرندەری جەیهان جێگیر بووە.

عەبدولغەنی ڕوونیشی كردەوە، نەوتگوێزەرەوەكە ئاڕاستەی ئەو شوێنە دەكرێت، كە گرێبەستی بۆ ئەنجام دراوە و وتیشی ئەم كارە دەستكەوتێكی گەورەی حكومەتی فیدراڵی و حكومەتی هەرێمە بۆ دەستپێكردنەوەی هەناردەی نەوت و زیادكردنی بودجەی وڵات بە ئەندازەی پێویست.

شەممەی ڕابردوو 27ى 9ى 2025 كاتژمێر شەشی بەیانی بۆ دوای دوو ساڵ زیاتر لە ڕاگیرانی، هەناردەی نەوتی هەرێمی كوردستان لە بۆ بەندەری جەیهانی توركیا دەستی پێكردەوە بەڵام ئەمجارە لە ڕێگەی كۆمپانیای سۆمۆوە و داهاتەكەیشی دەگەڕێتەوە بۆ بەغداد.