نایاسایی لە بڕیارەكەی وەزارەتی ڕۆشنبیری دا

وەزارەتی ڕۆشنبیری حكومەتی هەرێم فەرمانێكی وەزاری بە واژوی وەزیر بە ژمارە 4/1/3077 لە ڕێكەوتی 24/9/2020 دەركردوە كە سەرجەم بەڕێوەبەرایەتیە گشتیەكان و چاپ خانە حكومی و ئەهلیەكان پابەند دەكات كە پێدانی ژمارەی سپاردن بە هەر كتێبێك پێویستە لەلایەن لیژنەیەكی شارەزای ئەو بوارە لە بەڕێوەیەرایەتیەكە و پێداچونەوە و هەڵسەنگاندن بۆ كتێبەكان بكرێت وە دواتر ژمارەی سپاردنی پێ‌ بدرێت .

ئەوەی جێ‌ ی باس بێت لە ڕوی یاسایی و لۆجیكیەوە لەبەر ئەو هۆكارانەی خوارەوە كە ئاماژەیان پێ‌ دەدەین فەرمانەكە نایاساییە و پێویستە لەلایەن خودی وەزارەتەوە پوچەڵ بكرێتەوە :

1-پێداچونەوە بە پرسی ژمارەی سپاردن خۆی لەخۆیدا كارێكی باشە و ناكرێت بڵیین كە هیچ بەرهەمێكی چاپ كراو – كتێب و ئەوانی تر بە هەر زمان و شێوە زار و دیزاینێك – نابێت ڕەچاوی چوارچێوەیەك بكات و جۆرێك پابەندی نەبێت .

2-خودی ژمارەی سپاردن بۆ چاودێری نیە لەسەر كتێب و بەرهەمەكان وەك ئەوەی لەسەردەمی بەعسدا هەبوو ,بەشێوەیەك هیچ بەرهەمێك بواری لەدایك بونی نەبوو ئەگەر وەزارەتی ڕۆشنبیری بەعس مۆری (موافق)ی لەسەر دانەنایە !!

3-زانراوە كە ژمارەی سپاردن لەسەر كتێبی چاپ كراو تەنها بۆ ناسینەوەی كتێب و كۆكردنەوەی ئاماری فەرهەنگی و سەرژمێری فەڕمیە لە وڵات دا , چونكە ژمارەی سپاردن لە هەموو جیهاندا یەك سیستمی هەیە و بۆ تۆماركردنە , وە ئەم تۆمارە هیچ لە نرخ و ناوەڕۆكی كتێبەكە ناباتە سەرەوە .

كەواتە لە توندكردنی بەخشینی ژمارەی سپاردن ئەگەری زۆر هەیە كە كارەساتی ڕۆشنبیری زیاتر لە كایەی نوسین و مەعریفەدا بخولقێنێت و لەدایك بونی كتێبی گرنگ ببێت بە مەحاڵ !!

4-نوسراوە فەرمیەكەی وەزارەتی ڕۆشنبیری پشتی بە ڕێنمایی ژمارە 6ی ساڵی 1999 بەستوە كە وەزارەتی ناوبراو دەریكردوە, لەكاتێكدا ڕێنماییەكەی وەزارەت پێچەوانیە لەگەڵ هەریەك لە :

- ماددەی دووەم لەیاسای چاپەمەنی هەرێمی كوردستان ژمارە 10ی ساڵی 1993 كە هاتوە (چاودێری لە هەرێم دا ناخرێتە سەر چاپەمەنی و هەر هاوڵاتیەك سەربەستە لە دەركردنی هەر چاپەمەنیەكدا بەپێی حوكمەكانی ئەم یاسایە ) .

- ماددەی هەشتەم لە هەمان یاسای ئاماژە بۆكراو كە تیایدا هاتوە ژمارەی سپاردن مەبەست لێی چاودێری كردن نییە .

- بڕگەی دووەم لە ماددەی 38 لە دەستوری كۆماری عێراق ساڵی 2005 كە هاتوە ( دەوڵەت دەستەبەری ئازادی ڕۆژنامەگەری و چاپ كردن و ڕاگەیاندن و بڵاوكردنەوە دەكات ) .
كەواتە فەرمانێك پشت بەستوو بە ڕێنماییەك كە پێچەوانەی هەریەك لە یاسا و دەستور بێت لەسەر بناغەیەكی بەتاڵ بیناكراوە و هەر كارێكیش بناغەكەی بەتاڵ بێت ئەویش بەتاڵە !

5-ئەمە و فەرمانەكە وێڕای ئەوانەی كە باس كران هەڵەی ڕێنوسی و زمانەوانی تێدایە , كە پێویست دەكات نوسراوی فەرمی پێش بڵاوكردنەوەی لەلایەن شارەزایانەوە پاك نوس بكرێت .

كەواتە چۆن مامەڵە لەگەڵ ئەم نوسراوە بكەین ؟

1-لیژنەی ڕۆشنبیری و كۆمەڵگای مەدەنی پەڕلەمان لەسەر ئەم نوسراوە بوەستێت و بە نایاسایی بناسێنێت و ئاڕاستەی خودی وەزارەتی بكات .

2-ئەركی فەرمانگەی داواكاری گشتیە كە بەپێی دەسەڵاتەكانی خۆی و پشت بەست بە ئەركی (الطعن لمصلحة القانون ) تانە لە بڕیارەكە بدات و بە نایاسایی بسەلمێنێت.

هەروەها دادگای كارگێڕیش لە هەرێم بۆ هەر داوایەك كە بێتە بەردەستی , دەتوانێت وەك بابەتێكی تانە لێدراو بڕیاربدات بە هەڵوەشاندنەوەی فەرمانەكە و بەپوچەڵ (باطل) دانانی لەڕوی یاساییەوە .