ئێران لێكۆڵینەوە لە بۆچوونی ئەمریكا بەرانبەر پلانە حەوت خاڵییەكەی دەكات

پەیام

جێگری وەزیری دەرەوەی ئێران دەڵێت: بۆچوونی ئەمریكا لەبارەی داواكارییەكانیان لەژێر لێكۆڵینەوەدایە و ئامادەكاریی بۆ مامەڵە لەگەڵ هەموو سیناریۆكان دەكەن.

كازم غەریبابادی، جێگری وەزیری دەرەوەی ئێران لە لێدوانێكیدا تیشكی خستەسەر دواین پێشهاتەكانی دانوستانی نێوان وڵاتەكەی و ئەمریكا و وتی: ئەو پێشنیازەی لەلایەن عەباس عەراقچی وەزیری دەرەوە لە نیویۆرك پێشكەش كرا و لە ڕێگەی نێوەندگیرەكانەوە بە لایەنی ئەمریكی درا، كۆشكی سپییش وەڵام و بۆچوونی خۆی لەبارەیەوە پێشكەش كردووە.

لە درێژەی قسەكانیدا، كازم غەریبابادی وتی: لەئێستادا پێشنیازەكانی لایەنی ئەمریكی لەبارەی پلانە حەوت خاڵییەكەوە لەژێر لێكۆڵینەوە و پێداچوونەوەی نێوخۆییدایە و لە كاتی دروستبوونی هەڵوێستی كۆتایی لە ڕێگەی كەناڵە گونجاوەكانەوە ڕادەگەیەنرێت.

جێگری وەزیری دەرەوەی ئێران جەختی كردەوە "لەهەمانكاتدا وڵاتەكەی پارێزگاری لە ئامادەكاریی پێویست بۆ مامەڵەكردن لەگەڵ هەموو سیناریۆكانی دیكەدا دەكات".

ئەمەو لە میانی كۆبوونەوەی گشتی نەتەوە یەكگرتووەكان لە نیویۆرك لە كۆتایی مانگی ڕابردوو، عەباس عەراقچی وەزیری دەرەوەی ئێران پێشنیازێكی حەوتڕۆژی لە ڕێگەی نێوەندگیرەكانەوە ئاڕاستەی ئەمریكا كرد، بەڵام شەممەی داهاتوو سەرۆكی ئەو و ڵاتە پێشنیازەكەی ڕەت كردەوە.