پڕۆژەی هەژماری من خرایە سەر وەزارەتی دارایی

پەیام

پڕۆژەی "هەژماری من" كە حكومەتی ماوەبەسەرچووی هەرێم وەك پڕۆسەی بەبانكییكردنی مووچەی مووچەخۆرانی هەرێمی كوردستان دەیناسێنێت لە نووسینگەی سەرۆكوەزیرانەوە بۆ سەر وەزارەتی دارایی گواسترایەوە.

بەپێی نووسراوێكی سەرۆكی دیوانی ئەنجوومەنی وەزیرانی ماوەبەسەرچووی هەرێمی كوردستان پڕۆژەی هەژماری من تایبەت بە بانكییكردنی مووچەی مووچەخۆرانی هەرێمی كوردستان لە نووسینگەی سەرۆكوەزیرانەوە بۆ سەر وەزارەتی دارایی گواسترایەوە.

بەپێی نووسراوەكە كە ئەمڕۆ، یەكشەممە، بڵاو كراوەتەوە "وەزارەتی دارایی سەرپشك دەبێت لە بەڕێوەبردنی پڕۆژەكە لەبەر ڕۆشنایی یاسا و ڕێنماییە بەركارەكانی بانكی ناوەندی فیدڕاڵی".

نووسراوەكە ئاماژە بەوەش دەكات "ئەژماری بانكیی مووچەخۆر بەگوێرەی هەمان یاسا و ڕێنماییەكانی بانكی ناوەندی فیدڕاڵ پارێزراو دەبێت".

نووسراوەكەی دیوانی ئەنجوومەنی وەزیرانی ماوەبەسەرچووی هەرێم سەرجەم وەزارەت و لایەنە پەیوەنددارەكان بە جێبەجێكردنی فەرمانەكە و ئاسانكاریی بۆی ڕادەسپێرێت.

حكومەتی ماوەبەسەرچووی هەرێم وا پێناسەی هەژماری من دەكات كە پڕۆژەیەكی بەبانكییكردنی مووچەی مووچەخۆرانە و ئامانج لێی ئەوەیە زیاتر لە یەك ملیۆن مووچەخۆر لەم پڕۆسەیەدا تۆمار بكات.

بەپێی ڕاگەیەنراوێكیش كە لە 28ی شوبات، مانگی دووی ساڵی 2023ی فەرمانگەی میدیا و زانیاری بڵاوی كردووەتەوە، پڕۆژەی هەژماری من ڕاگەیەنراوە.