لە بناری قەندیل تەرمێک دۆزرایەوە کە گومان دەکرێت منداڵە بێسەروشوێنەکە بێت

پەیام

لە بناری قەندیل تەرمێک دۆزراوەتەوە، کە گومان دەکرێت، تەرمی یاد سەرباز بێت، ئەو منداڵەی لە 28ـی مانگی ڕابردووەوە بێسەروشوێنە.

ڕێناس ئەرسەلان پەیامنێرى پەیام لە ئیدارەى ڕاپەڕین ڕایگەیاند: ئەمڕۆ لە دەوروبەری گوندی ئێندزەی بناری قەندیل تەرمێک دۆزراوەتەوە، تیمەکانی بەڵگە و تاوان چوونە شوێنی ڕووداوەکە بۆ دڵنیابوونەوە لەوەی کە ئەو تەرمە تەرمی یاد سەربازە یاخود نا.

وتیشى "ئەو تەرمەى کە دۆزراوەتەوە پێدەچێت تەرمى یاد سەرباز بێت، بەو پێیەى جلەو بەرگەکەى لە جلو بەرگى ئەو منداڵە دەچێت".

یاد سەرباز، منداڵێکی تەمەن چوار ساڵانی دانیشتووی هەولێر و خەڵکی دەڤەری باڵەکایەتیە، ڕۆژی 28-6-2026، لە دووەم ڕۆژی جەژنی قوربان، لە گوندی ئێنزێ لە بناری قەندیل بێسەروشوێن بوو. یاد لەگەڵ دایکی بۆ سەردانی ماڵی باپیرانی چووەتە ئەو گوندە و تا ئەمڕۆ چارەنووسی نادیارە.